NISUTOY ngadto sa 22 ka gold ang nalangkat sa Pilipinas samtang nagsulat ko karong buntag sa ikaduhang adlaw sa gipahigayong SEA Games 2019. Ang Vietnam kay 10 pa ang ilang naangkon.
Moabot na og 43 ka medalya tanan ang sa Pilipinas samtang nagsunod si Vietnam nga dunay 32 ka mga medalya.
Labing maayo kon magpadayon kining maong trend ngadto na sa Disyembre 11, ang katapusang adlaw sa mga duwa.
Daghan ko og gihulat nga mga events sama sa football, basketball, ug volleyball.
Ambot lang ning volleyball kay lig-on man ang atong mga kaatbang. Hinuon, murag dunay chance makamedalya basi sa performance sa atong mga pangbato sa beach volleyball.
Ambot lang sab kon maka-gold ba kita sa basketball ug sa football.
Ang ako lang masulti nga dinhi sa Pilipinas, mas dako nato nga dungog kon makadaog sa basketball. Apan sa atong silingang mga nasud, mas mahinungdanon nila ang football.
Manila
Sa laing bahin, gikwestyon ni presidential daughter ug Davao Mayor Inday Sara Duterte-Carpio kining paggamit sa kanta sa Hotdogs nga “Manila” sa opening program sa SEA Games 2019.
Sensitibo baya ang mga taga Visayas ug Mindanao kabahin niining sobrang pagka sentro sa Manila ang atensyon sa atong mga lider ug sa ubang nasud sa kalibotan.
Kon sa kanta lang, naglibog sab ko unsay pwede gamiton nga ilado ug pwedeng masayaw. Pang-alegre sa opening program ba. Kanang morag opening sa Eat Bulaga.
Sa pikas bahin, duna say nakauyon sa kantang “Manila” kay ang syudad nga Manila nahimo na gud kining simbolo sa Pilipinas isip capital sa nasud.
Ang maong kanta nasikat na sab sa tibuok kalibotan kay mao man kini ang kantakantahon sa mga Pinoy nga gimingaw na sa pinalanggang nasud.
Alang kanako, pwede ra man unta kining palabyon. Apan makapaintriga kanako ang pagtingog mismo ni Inday Sara.
Komentaryo ba lang kini? O dunay nagpaluyong sentimento batok kang House Speaker Alan Peter Cayetano nga nagpabelib nga kaya niyang pangulohan ang pangandam ug pagpahigayon sa SEA Games.
Binilyon baya ang budget ug daghan ang wala makontento sa performance sa event organizer.
Ato lang klaruhon nga lahi ang nagdumala sa mga sports events ug sa atong mga atleta. Lahi sab ang pagtukod sa mga infra ug pag-organize dayon pag-manage sa event.
Nagkabangi
Ang ako lang nga samtang nagkabangi kita sa ubang mga aspeto sa SEA Games 2019, ang importante mao ang atong panaghiusa alang sa atong mga atleta. (@anol_cebu sa Twitter)