NIBOKAL na? Duha pa ka tuig ug lima pa ka buwan usa ang sunod nga piliay sa presidente kun national elections sa Mayo 9, 2022, apan nagsugod na og bukal ang kaldero (dili kaldero sa SEAGames) sa pulitika dinhi sa dakbayan sa Sugbo.
Gikan sa usa ka kasaligan nga tinubdan, di na kapugngan, matud pa, nga modagan og balik si Cebu city Bise Mayor Mike Rama pagka mayor. Gani, matud pa sa akong tinubdan, nagpasabot na si Bise Mayor Rama sa iyang intensyon ngadto sa kampo sa Bando Osmeña Pundok Kauswagan (BOPK), nga gipangulohan ni kanhi Mayor Tomas Osmeña.
Wa pa hinuoy klaro nga storya kon motando ba si Kanhi Mayor Tomas sa maong plano ni Bise Mayor Rama, nga modagan pagka mayor ubos sa usa ka kwalisyon sa iyang Barug Team Rama ug BOPK.
Ang storya nga agi og haylo ni kanhi Mayor Tomas aron si Bise Mayor Rama ang mahimo nga kandidato pagka mayor ubos sa maong kwalisyon padaganon si kanhi konsehal Margot Osmeña, ang asawa ni Tomas, pagka kongresista sa Cebu city South Congressional District ug suportahan sa partido ni Rama.
Daghan ang ginganlan nga maoy mahimo nga kandidato pagka bise mayor unya ni Rama apan wa pay klaro tungod mag-agad unya kinsa ang gusto nga itudlo sa BOPK nga modagan pagka bise mayor nga taga north district tungod kay si Rama taga south district man. Usa sa ginganlan nga posible maoy kandidato pagka bise mayor mao si Kon. Nestor Archival, nga taga Talamban.
Atong mahinumduman nga pagdagan ni Archival nga bise mayor ni Tomas niadtong Mayo 2013 nga piliay napildi siya ni karon Mayor Edgardo C. Labella samtang si Rama napildi ni Tomas pagka mayor. Hinuon, sa miaging piliay niadtong Mayo 13, 2019 napildi ni Labella si Tomas ug nahibalik si Rama nga bise mayor.
Kining maong kalamboan bisan tuod og dili na presko kay dugay na man nga gibaniog nga modagan og balik pagka mayor si Rama apan atong matan-aw nga ang mga pulong nga gibuhian ni Bise Mayor Rama sa publiko nga usa ug kauban lang gihapon sila si Mayor Labella pulos lang diay storya ug way kamatuoran.
Kon mahinumduman ta niadtong miaging piliay pagka mayor, di gyud unta moatras si Rama nga modagan pagka mayor. Apan tungod sa sitwasyon diin nalakip ang iyang ngalan sa listahan ni Presidente Duterte sa mga pulitiko nga nalambigit sa negosyo sa ilegal nga drugas, way nahimo si Rama gawas sa pagdagan nga bise mayor ni Mayor Labella.
Gani, daghan ang nag-ingon nga kon midagan pa si Rama pagka mayor ug nahug nga tolo ang kandidato pagka mayor, dunay dakong puruhan nga napili unta og balik si Tomas Osmeña pagka mayor. Gidrama gani og maayo ni Rama nga usa ka “supreme sacrifice" ang iyang pagdagan pagka bise mayor.