ADUNAY surpresang giandam si pound-for-pound champion Manny Pacquiao (50-3-2, 38KOs) sa iyang pagpakigbatok kang Ghanaian Joshua Clottey (35-3, 20KOs) karong buntag (Sabado sa gabii sa US) sa The Event boxing promotion sa US$1.2 billion Dallas Cowboys Stadium sa Texas.
Sa usa ka interbyu nga nakuha sa www.gmanews.tv, si Pacquiao, kinsa modepensa sa iyang World Boxing Organization (WBO) welterweight champion, wala mosaad og knockout apan iyang gitino nga masurpresa gyud ang mga mahiligon sa boksing sa iyang pagabuhaton ibabaw sa ring.
“I am not going to promise you a knockout, but I will do my best,” matod sa 7-time world champion. “We have a strategy that we created in our training so people are going to be surprised.”
Sa official weigh-in kagahapon, si Pacquiao nitimbang og 145 pounds samtang si Clottey nihaom sa 147 weight limit.
Dihang nagpahulagway ang duha ka mga boksidor human sa weigh-in, nisuway si Clottey pagtutok og hait kang Pacquiao apan miduko ang Pinoy ug nakigkomedyahay na lang sa kampo ni Clottey. Nagkinataw-anay na lang sab ang duha ka mga protagonista.
Pacquiao 6 rounds ra
Sa laing interbyu, ang trainer ni Clottey nga si Lenny de Jesus nitagna sab nga matikangkang si Pacquiao sulod sa unom ka rounds, sama sa labing ulahing prediksyon sa trainer ni Pacquiao nga si Freddie Roach.
“I’m not hoping... I’m going for a knockout,” matod pa ni De Jesus, kinsa maoy kanhi cutman ni Pacquiao niadtong 2003 hangtod 2005.
Kabahin sa prediksyon ni de Jesus, kalmado rang nihatag og reaksyon ang Pambansang Kamao sa Pilipinas.
“He can knock me out in 6 rounds?” dalang pahiyom nga pangutana ni Pacquiao. “Interesting. Malaya silang magsabi ng ganun.”
Clottey nanglupyak
Sa sayo pa, grabe ang pagpasingot ni Clottey aron makuha ang sakto nga timbang ug nabantayang nanglupyak og maayo ang iyang dagway.
“Ang lalim ng mata, tapos humpak dito sa pisngi. Pagtapos, nung naghubad, ang lalim din ng katawan. Tuyung-tuyo na,” asoy pa ni Roger Fernandez, usa sa mga Filipino assistant trainers ni Pacquiao.
Si Fernandez hilom lang nga nilili sulod sa gym dihang nagpasingot si Clottey.
Nidugang si Fernandez nga tungod kay grabe ang pagpakunhod og timbang ni Clottey, hayan nadugangan ang bintaha ni Pacquiao alang ni awaya.