DAKPAN ang ka mga batan-on nga maoy suspek sa sagunson nga pagpamato sa Sayre Highway sa Don Carlos, Bukidnon.
Upat ka sakyanan ang ilang gibiktima kung diin dili mominus sa P100,000 tanan ang damyos sa pagkaigo sa windshield.
Giila ang mga suspetsado nga mao sila si Christian P. Salaosao ug John Mark R. Sumabil, pulos hingkod ang edad, wala’y mga trabaho, ug residente sa Barangay Poblacion Norte, Don Carlos, Bukidnon.
Sa inisyal nga imbestigasyon sa Don Carlos Police Station, nasuta nga upat ka mga sakyanan ang mireklamo human nangabuak ang windshield samtang gaagi sa Sayre Highway sa Don Carlos.
Unang mireport ang driver sa Fuzo Fighther Truck gipanag-iyahan ni Jun Abrena ug gimaneho ni Roberto Q. Plaza nga naguba ang wala sa windshield nga adunay gibana-banang damyos nga P10,000.
Ikaduhang mireklamo ang driver sa Toyota HiAce Commuter Van gipanag-iyahan ni Sinudin S. Kido ug gimaneho ni Roel R. Payno nga misulti nga walang porsyon sa windshield ang nadamage mokantidad og P40,000.
Mireklamo sab ang driver sa duha ka planetary truck nga mao si Ruel Cantanao sa pagkabuak sa windshield nga gibana banang modamyos og P30,000.
Gilusad sa kapulisan ang operasyon ug malampuson nga nadakpan ang duha ka batan-on nga karon nagtingkagol na sa prisuhan.