DILI tanan negosyo o kompanya nagsugod sa kahayahay deretso. Daghan pang dagom ang gilutsan aron maabot niini ang kalamposan karon.
Ang Del Monte Philippines nga usa sa pinakadakong kompanya sa Pilipinas, kon asa ang cannery ug plantasyon anaa sa siyudad sa Cagayan de Oro ug Bukidnon, ang magselebrar na sa ilang ika-93 ka tuig nga kalamposan karong 2019.
Ang humble beginnings niini nagsugod tuig 1926 kon asa gisugdan ang experimental plot sa Diklum sa Manolo Fortich kung diin ang korona sa pinya gitigum ug gitanom isip sinugdanan.
Nahatagan og higayon ang SunStar Superbalita nga makasuroy sa ilang dakong plantasyon nga nahimutang sa Manolo Fortich, Bukidnon niadtong labing unang Philippine Industrial Summit in Mindanao.
Sumala pa sa ilang mga kadagkoan nga adunay upat ka camp ang plantasyon nga gilangkuban sa pito ka lungsod sa Bukidnon, sama sa Manolo Fortich, Libona, Sumilao, Quezon, Valencia, Don Carlos, ug Malaybalay.
Sa maong plantasyon, adunay mga lugar kung asa didto nga area ang maayo tamnan, samtang aduna sab area nga didto lang pangkuhaon ang mga seedlings nga preparasyon aron itanom.
Sa Bukidnon, adunay 22 ka ektarya nga plantasyon kung diin nakapangempleyo kini sa mokabat 10,000 ka trabahante nga sagad taga Bukidnon.
Aron himsog ang mga pinya, ilang papahulayon ang yuta nga gikan giharvesan niini ug kaadtong mga nahibilin nga mga korona sa pinya ilang palataon sa yuta aron mobalik iyang kahimsog sulod sa lima ngadto unom ka bulan.
Lahi-lahi sab ang variety sa pinya diin ang sweet 16 mao kini ang pinakatam-is nga mahimong kan-on, samtang ang clone 74 mao ang ipangsulod sa lata.
Ang tanan harvest dalahon sa Del Monte cannery nga nahimutang sa Bugo, ning siyudad sa Cagayan de Oro.
Gawas sa pinya, nasayran nga ang Del Monte aduna sab mga plantasyon sa kapayas o papaya nga anaa sa Balingasag ug Opol, Misamis Oriental.
Gikonsidera karon ang plantasyon nga farm tourism ug usa sa pinakadakong atraksyon sa lalawigan sa Bukidnon.