SUPERBALITA CEBU

Editoryal: Sidewalk vendors

Editorial cartoon by Ariel Itumay

GIDAYEG ni Manila City Mayor Francisco “Isko Moreno” Domagoso ang kalimpyo sa dakbayan sa Sugbo atol sa iyang hamubong pagbisita sa siyudad niadtong Sabado, Nobiyembre 30,

Iyang gitumbok mao ang mga bangkita o mga sidewalk nga wala nay makita nga may naninda - dakong sukwahi kaniadto.

Ang maong mayor nakadalikyat og anhi sa Sugbo human kini imbitaha isip pinasidunggang dinapit sa 32nd Anniversary ug Christmas party sa Cebu Lady Lawyers Association nga gihimo diha sa Casino Espanol.

“Luminis na ‘yung Cebu. Nabawasan ‘yung nasa bangketa . Eh, di good for you. Can you imagine if I am an investor? I saw it. I (would) want to invest here kasi ‘yon ang impression,” matod sa mayor.

Si Moreno, gawas sa iyang pagka kanhi artista, nisamot og kasikat karon tungod sa iyang way kahadlok nga pagdemolis sa mga illegal structures daplin sa dalan ug mga illegal nga mga sidewalk vendors.

“Most of the roads must be brought back to the people. Only God is right, but you have to be just all the time,” dugang niya.

Siguro ang gipadayag ni Mayor Isko mao lang ang iyang nakita sa pipila ka mga dapit sulod sa hamubo lang nga panahon.

Tukma usab kaayo ang pagbisita ni Mayor Isko sa Sugbo kay kini nahitabo usa ka adlaw sa wala pa tugoti ni Cebu City Mayor Edgar Labella ang mga vendors nga makabalik og paninda sa mga sidewalks.

Sa higayon nga makadalikyat og balik si Mayor Isko dinhi sa dakbayan, posibling lahi na usab unya ang iyang makita nga mahimong makapakurat kaniya.

Sugod niadtong Disyembre 1, Dominggo, namalik na ang mga sidewalk vendors ug hinayhinay na usab ang kaalegre ug kasamok sa mga dalan. Hinuon, dunay mga kondisyones nga gipasunod si Labella ngadto sa mga vendors, pero ambot og makombinsi ba ang national government niini.

Sa pagkakaron usa lang ang maklaro. Nadala ang mayor sa pressure sa mga sidewalk vendors, di sama ni Mayor Isko.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph