MIBANSIWAG na ang kahayag sa higanteng Christmas tree sa siyudad sa Tagum, nga gipasiga, Disyembre 1.
Ang pagpasiga sa icon sa dakbayan gitambungan sa libuan ka mga tawo, Tagumenyos ug mga bisita gikan sa kasikbit dapit.
Makahingangha ang higanteng Christmas tree nga may sukod 193 feet, mas taas sa kanhi sukod nga 186 feet.
Gikonsidera labing taas nga Christmas tree sa Pilipinas, kini gidayan-dayanan sa 5,000 ka colorful nga suga, uban ang 23 ka mga dan-ag nga bituon nga nagrepresenta sa mga barangay sa Tagum.
Makita sab ang dakong bituon sa ibabaw nga may walo ka rays nga nagrepresenta sa 8th City Council.
Suma pa sa City Government of Tagum, ang desinyo karon nga tuig inspired sa Enneagram.
Una ang pormal nga pagpasiga, may presentasyon pa sa mardi gras gikan sa mga estudyante sa UM Tagum College.
Mipatugtog gamit ang saxophone si Cegred Lou Bulotano.
Nangharana sab sa ilang mala-anghel nga tingog ang City Band singers, Loetscher Idul, ug Tawag ng Tanghalan Rafaelo Canedo ug Adele Nicole Yu.
Nanganta sab sila Konsehal Alderson Rellon ug Atty. Ana Alvarez.
Mga opisyales sa Tagum mitambong sab sa aktibidad uban ang Tagum City Government.