TULUNAN, North Cotabato -- Aron mahiluna ang mga molupyo sa pipila ka bahin sa North Cotabato nga gitay-og sa makusog nga sunod-sunod nga linog niadtong Oktubre, ang buhatan sa Bise Gobernador sa NorCot ang mihimo og dakong inisyatibo aron sila mahiluna.
Lunes sa buntag, Disyembre 2, mismong si North Cotabato Vice Governor Emmylou “Lala” Taliño-Mendoza ang mi-turnover sa lima ka mga temporary transitional shelter ngadto sa mga pamilya nga nahimong benepisyaryo sa programa nga gikan mismo kaniya.
Ang turnover ceremony gisaksihan sa ubang mga opisyal sa mga buhatang lokal sa probinsya uban sa mga residente ug mga pribadong sektor.
Gibutyag sa bise gobernador nga pasiuna pa lamang kini sa dul-an gatus ka mga temporary shelter sa mga biktima sa linog nga ihatag sa iyang buhatan subay sa mga donasyon nga gipaabot sa katawhan.
Sumala ni Taliño-Mendoza nga kinahanglan dili magdugay nga magtinir sa mga evacuation areas ang mga bakwit gumikan haduol sila sa peligro ug sakit.
“Dili angay magdugay sa mga tents ang mga evacuees, maong mihimo gid kita sang pamaagi nga aton sila mahaw-as diha,” ingon ni Taliño-Mendoza.
Ang maong mga barong-barong mokantidad og P33,200 matag usa aron masayran sa pipila nga buot modonar og mga materyales nga matukod sa gipahulam nga luna sa Purok 1, Brgy. Magbok, Tulunan, NorCot.
“Kay ara man kita mga fylwood nga ginhatag sa Zamboanga del Sur, so P28,800 ang kantidad sa mga palaliton sa usa ka shelter,” sumpay sa bise gobernador.
Niya pa, nga mas maayong dili cash ang ihatag sa modonar, inay mga materyales kini nga anaa sa maong kantidad ug dalhon ngadto sa buhatan sa bise gobernador.
“May ara man kita mga service para maghatud sa mga materyales diri, para matukod naton sang mga shelter, madamo gid nga salamat sa tanan,” panapos sa bise gobernador.