ARON masiguro nga aduna’y daling makaresponde panahon nga adunay maritime emergency duol sa tugpahanan sa Mactan, misulod og kasabutan ang Mactan - Cebu International Airport Authority (MCIAA) ug ang Philippine Coast Guard - Coast Guard Station Cebu (PCG - CGS Cebu) kabahin niini.
Niadtong Lunes, Disyembre 2 , hingpit nang gipirmahan sa duha ka ahensiya ang memorandum of agreement (MOA) tima-an kini sa hugot pa nga seguridad sa coastal area du-ol sa MCIA.
“The MCIAA and PCG entered into a Memorandum of Agreement dated April 12, 2018 for a period of Ten (10) years effective until March 31, 2028 whereby the PCG occupies and utlizes a portion of land in the General Aviation area, MCIA, Lapu-Lapu City, as Air Station and Hangar,” tipik sa maong MOA nga gipirmahan nila ni CGS Cebu Station Commander Commodore Ronnie Gil Gavan ug ni MCIAA General Manager/CEO Atty. Steve Dicdican.
Gawas sa paghatag og dapit nga ma-istaran sa Coast Guard nga buhatan ug billeting sa tugpahanan, kinahanglan usab mogama ug mosumiter ang PCG - CGS Cebu og detailed disaster plan nga nahasubay ug kasamtangan nga Disaster Plan sa MCIAA.
Gipirmahan ang maong MOA niadtong Lunes, Disyembre 2 sa Waterfront Mactan.
Matod sa tigpamaba sa PCG 7, Lieutenant Junior Grade Michael John Encina nga nagsugod ang partnership sa MCIAA ug sa CGS Cebu niadto pang niagi nga tuig dihang gisugdan nila ang ilahang Coast Guard K9 team.
Usa sa tumong sa maong partnership usab nga matukod ang CGS MCIAA-Lapu Lapu City.
Aduna’y mga floating assets ang ipakatap sa coastal area sa airport aron masiguro ang siguridad niini.
Subay gihapon ang maong partnership sa Intensified Community Awareness Response and Enforcement (iCARE) nga programa sa PCG 7.
Dugang ni Encina nga lakip ning komunidad duol sa dapit nga malambigit sa seguridad diin mao kini ang gihulagway nga coast guardians. (HBL)