WALA makapugong ang bati nga panahon nga epekto sa Bagyong Tisoy sa mga sakop sa Lapu-Lapu City Police Office (LCPO) sa pagpang apod-apod sa ilang sayong pinaskohan ngadto sa 50 ka mga senior citizen sa Barangay Ibo, Dakbayan sa Lapu-Lapu kagahapon, Disyembre 2.
Grocery items nga dunay sulod nga mga de lata, bugas ug uban pa ang gipang apod-apod sa kapulisan ngadto sa mga senior citizen. Nakadawat sab sila og sliced bread ug packed lunch.
Mas nakahatag og dugang kalipay sa mga senior citizen mao ang gihalad nga awit sa mga sakop sa LCPO ngadto kanila nga daw sa giduyogan sila niining panahon sa Pasko.
Ang kalihukan nagsilbing launching sa kapulisan sa ilang “Handog Pamasko sa LCPO 2019” ngadto sa nanginahanglan nga mga Oponganon.
Ubos sa naasoyng programa ang kapulisan gikatakdang manaygon sa nagkadaiyang barangay ug komunidad sa dakbayan hilabi na ngadto sa mga walay kaya.
Apan ang nakalahi niini kay inay sila ang tagaan o hulgan sa ilang gidaygonan, sila ang mohatag og mga grocery items sa ilang gipamasakohan.
Matod ni Police Colonel Clarito Baja, director sa LCPO, pagpakita kini nga ang kapulisan dili lang alang sa pagpatunhay sa kahapsay ug kalinaw kon dili lakip na usab sa pag-atiman sa mga nanginahanglan natong mga ka-igsuonan.
Gipili nilang sa Barangay Ibo buksan ang ilang programa sanglit ang naasoyng barangay nabiktima ug usa ka dakong sunog duha ka buwan ang nakalabay.
“Ang ato ani makapahalipay sa atong kaigsuonan labi na sa mga senior citizens, mga voluntary contributions ni sa atong mga personnel ang atong gipanghatag ug naa say uban nga gikan sa atong mga private sectors nga ni-dontae sila,” matod ni Baja.
Sa mosunod mga adlaw lain na usab nga barangay ug komunidad ang bisitahon sa LCPO aron panaygonan.
Gibutyag ni Baja nga ang kadagkuan na sa barangay maoy motudlo sa mga pinaka kabus sa ilang lugar nga angayang tagaan sa pahalipay sa kapulisan. (GCM)