ADUNA nay gipangdudahan karon ang Special Investigation Task Group nga nag-imbestigar sa pagpusil patay sa kanhi hepe sa Provincial Intelligence Branch (PIB) sa Cebu Provincial Police Office nga si Police Lieutenant Colonel Joie Yape.
Si Yape gipusil patay sa riding in tandem sa Molave street, Barangay Kamputhaw, Siyudad sa Sugbo niadtong Nobiyembre 21, 2019.
Matod sa officer-in-charge sa Cebu City Police Office Police Colonel Giovanie Maines nga aduna na silay gipangdudahan kinsa ang nipusil patay kang Yape.
Dugang ni Maines nga sa pagkakaron di pa nila mabutyag kon kinsa kini sanglit wa pa silay igong ebedensya nga magtumbok kanila sa krimen.
Ang gihimo karon sa SITG mao ang pag eliminate kinsa kanila ang mahimong adunay dakong kasuko kang Yape nga maoy ilang patutukan.
“Mayroon na pero at the moment di ko i-reveal sa inyo kasi under investigation nga. Pag aralan muna naming mabuti kung masapat na ebedensya na kami, that’s the time na ilalabas namin,” matod ni Maines.
Nakahatag na usab og pamahayag ang mga saksi sa insidente nga naa na sa SITG.
Apan ang ilang gitinguha nga mapadali mao ang resulta sa pagpa-enhance sa CCTV video aron masayran ang plate number sa motorsiklo nga gisakyan sa gun man. (AYB)