GIPAABOT nga makapahimos na ang matag lokal nga kagamhanan sa Probinsya sa Sugbo karon nga giaprubahan na sa third ug final reading ang P12 bilion nga budget sa Probinsya sa Sugbo sa 2020.
Lunes, Disyembre 2, 2019 giaprubahan sa Hunta Probinsyal ang budget sud lang sa pipila ka mga minuto.
Niadtong Nobyembre 25, 2019 atol sa out of town session sa Isla sa Camotes, nasayran nga gilangay una sa Hunta Probinsyal ang pag-aprubar niini tungod kay buot pa unang susihon pag-usab.
Una na nga mipahibaw si Gobernador Gwendolyn Garcia nga ubos sa budget, gahinan og labing dako nga pundo nga mokabat sa P6 bilyones ang social services diin nalakip ang mga hospital.
Lakip sa gihatagan og prayoridad ni Garcia mao ang pag-improve sa mga imprastraktura, barangay health stations, heritage parks sa mga lungsod nga gigahinan og P5 bilyones ingon man ang pagkonkreto sa target nga 250 kilometros nga provincial roads ug 100 kilometro sa barangay roads.
Gawas niana, gigahinan usab og labing dako nga pundo ang pag upgrade sa provincial hospitals nga moabot og P4.2 bilyones isip pagpangandam na usab sa Universal Health Law.
Sa iyang bahin nagpasalamat usab si Garcia sa paspas nga pagpasar sa hunta probinsyal ug misaad kini nga mahibalik kini sa mga konstituente sa Probinsya.
“I am grateful for the trust and confidence that the Provincial board has given me in the speedy approval of our 2020 budget. You can be rest assured that this budget will be of most benefit to our constituents in the province”, matod ni Garcia. (ANV)