SUPERBALITA CEBU

Way klase, biyahe gikanselar

WAY MGA BIYAHE. Mingaw kaayo ang wharf terminal sa Punta Engaño sa Lapu-Lapu City human gikanselar sa Philippine Coast Guard (PCG) ang tanang mga biyahe sa kadagatan. Gipahibawo usab sa Siyudad ang pagkanselar sa tanang boat trips sa Dakbayan sa Lapu-Lapu padung sa gagmay nga mga isla. Apektado sa bagyong Tisoy ang mga biyahe sa barko ug eroplano human kini gipangkanselar. (Allan Cuizon)

ALANG sa seguridad sa mga tinun-an sa Probinsya sa Sugbo, gipahibaw sa pangu sa Provincial Disaster Risk Reduction and Management Office (PDRRMO), Neil Sanchez, nga wala gihapo’y klase sa tanang mga tinun-an gikan sa kindergarten hangtod na sa high school sa mga pampublikong tunghaan sa amihanang bahin sa Sugbo.

Kini maoy nakab-ot nga desisyon sa PDRRMO cluster Lunes, Disyembre 2, 2019 atol sa panagtagbo niini.

Magpabilin usab ang suspension order sa klase sa mga tinun-an sa kindergarten hangtod sa elementary sa mga pampublikong tunghaan sa habagatang Sugbo.

Samtang si Cebu City Mayor Edgardo Labella nideklarar nga way klase gikan sa pre-school ngadto na sa high school, pribado ug tunghaang pampubliko.

Matod ni Labella nga iyang gilakip ang high school kay daghan sa mga tinun-an naa sa kabukiran.

Samtang ang mga Dakbayan sa Mandaue ug Lapu-Lapu mideklarar lang nga gikan sa pre-school ngadto sa elementarya ang way klase kay signal no. 1 ra gipaubos ang Metro Cebu.

Gipaubos na sa red alert status ang Sugbo hinungdan nga giabisohan ang tanan nga local disaster risk reduction management offices nga mangunay pagtabang sa mga lumolupyo duol sa baybayon, bukid o lupa nga mga lugar nga mobakwit na aron malikayan ang mga katalagman.

Lakip sa mga apektadong lugar sa amihanang bahin sa Sugbo mao ang Asturias, Bantayan, Bogo City, Borbon, Carmen, Catmon, Daanbantayan, Danao City, Madridejos, Medellin, Pilar, Poro, San Francisco, San Remigio, Santa Fe, Sogod, Tabogon, Tabuelan, Tuburan, Tudela sa Camotes Island ingon man ang Metro Cebu ngadto na sa habagatang bahin sa dakbayan sa Carcar.

Gibutyag ni Sanchez nga may pipila nga ningbakwit na lang ug wa na maghuwat sa disaster team nga muabiso kanila.

Apan tungod sa kabalaka usab niini sa seguridad sa mga balay, namalik kini.

“Naay uban nga mo-volunteer. But, para nako if the LDRRMO would say you should evacuate for the time being, mao pod bitaw na nga anyway ang PNP mo-check gyud sa ilang security kay mao man gud nay concern nila kinsay mobantay sa ilang balay. That’s why we asked PNP nga maoy mo-secure sa mga areas”, matod ni Sanchez.

Tungod sa kusog nga bunok sa uwan nga posibleng masinati sa norte ug pipila ka bahin sa Probinsya sa Sugbo, gipahibaw niya nga di angay mabalaka apan, mangandam tungod kay posibleng pagngon ang kuryente tungod sa ka-delikado nga may makuryentehan.

Samtang kapulisan sa dakbayan ug lalawigan sa Sugbo naka-full alert tungod sa bagyong Tisoy.

Si Police Colonel Giovanie Maines, officer-in-charge sa Cebu City Police Office ug kasamtangan nga Deputy Regional Director for Operations sa Police Regional Office 7, nag monitor sa tibuok rehiyon 7.

Kon adunay mga hitabo sa probinsya sa Sugbo, makapadala dayon silag personnel nga naka standby nang daan sa kampo sa Don Sergio Osmeña.

Gisaka na usab nila ang ilang alert status aron pagpangandam. Dugang ni Maines nga ilang gi monitor ang mga bukirang barangay nga delikado sa pagbaha ug pagdahili sa yuta.

“We have already instructed them lalo na may area na bulobundukin na kung sakaling mag worsen itong situation, you are already adviced to go to them and advice them na to go to safer places,” matod ni Maines.

Gimandoan usab niya ang mga chief of police sa kalungsuran ilabi na ang habagatang bahin sa probinsya sa Sugbo nga makig alayon sa mga local disaster unit alang sa search and rescue operation.

Wa pa hinuon makadawat og report si Maines nga aduna nay angay pabakwiton.

Samtang si Police Colonel Roderick Mariano mipa alerto na usab sa iyang mga personnel sa kalungsuran.

Way biyahe

Lunes, gibutyag ni Cebu Ports Authority (CPA) Operations Officer, Adolfo Abregana Jr. nga moabot sa 650 ka mga pasahero ang na stranded sa mga pantalan sa probinsya ingon man dinhi sa Sugbo sama sa Pier 1, Pier 3, Sta. Fe (Hagnaya) port ug Taloot sa Argao.

Samtang sa datus sa Philippine Coast Guard (PCG) 7, niabot na sa 74 ka biyahe sa barko ang gikanselar gikan sa Sugbo ug Bohol.

Aduna’y natala ang PCG 7 og 468 ka mga pasahero nga stranded. Lakip sa wa na makabiyahe ang 78 ka rolling cargoes, 71 ka passenger vessels, ug 45 ka motorbancas.

Matod sa PCG 7 pinaagi sa tigpamaba niini nga si Lieutenant Junior Grade Michael John Encina, nga ang biyahe gikan sa Santander sa habagatang Sugbo paingon sa Sibulan mao lang ang gitugutan nila nga makalawig.

Gipangkanselar usab ang mga flight nga manukad sa Mactan Cebu International Airport (MCIA) padung sa Tacloban City, Legazpi City, Manila ug ubang international destination nga motadlas sa agianan sa bagyo.

Signal no. 2

Gipaubos sa signal no. 2 ang amihanang bahin sa Sugbo samtang anaa sa signal no. 1 ang Metro Cebu subay gihapon niining Bagyong Tisoy.

Ang Philippine Atmospheric, Geophysical and Astronomical Services Administration (Pagasa) nipaubos na sa Northern Cebu sa signal no. 2 alas 2 sa hapon, Lunes.

Naglakip kini sa Daanbantayan, Bantayan, Madridejos, Santa Fe, Medellin, Bogo City, San Remigio, Tabogon, Tabuelan, Tuburan, Carmen Borbon, Sogod, Catmon, Asturias, ug Camotes Islands.

Samtang nagpabilin sa signal no. 1 ang Metro Cebu diin naglakip kini sa Balamban, Toledo City, Pinamungahan, Aloguinsan, Naga City, Talisay City, Cordova, Minglanilla, Lapu-Lapu City, Mandaue City, Cebu City, Consolacion, Liloan, Compostela, and Danao City. (ANV, HBL, AYB, FMD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph