SA IYANG ulahing hagit, si Presidenti Rodrigo Duterte mibaraw ni Bise Presidenti Leni Robredo kabahin sa tinguha niini nga magpapili pagka-presidenti sa umaabot nga eleksiyon.
Matod ni Duterte walay katakos si Robredo sa pagdumala sa nasod.
Daghan nang higayon nga mipasumbingay si Robredo nga magpapili isip sunod nga pangulo sa nasod.
Duna ba gyud kapasidad si Robredo pagdumala sa nasud o basin nasayop si Duterte sa iyang pangagpas kabahin sa atong bise presidenti.
Sa iyang tubag, matod ni Robredro angay unta hatagan og igong pagtagad ni Duterte ang kampaniya sa ginadiling drugas imbes maghisgut og politika nga layo pa man ang eleksiyon.
Ang kamatuoran karon sa Pilipinas mao nga bisan layo pa ang eleksiyon, kanunay nang nagpakita sa ilang lihok sa politika ang mga opisyal nato.
Busa dili gyud angay ikatingala nganong ingon niana ang reaksiyon ni Duterte ngadto kang Robredro.
Pagkakaron, ang gusto mahibaw-an sa katawhan mao ang kalamboan sa nasod. Kalamboan nga dunay pagkunhod sa kriminalidad.
Pero, sa atong pagpaniid karon, medyo salikwaot kaayo ang programa sa gobiyerno nga maundang kining problema sa drugas ug uban pang matang sa kremin.
Unta ilang unahon ang pagkampaniya diha sa insaktong pagdumala sa pamilya. Kay kon lig-on ang usa ka pamilya seguradong malinawon usab ang komunidad.
Pagkakaron gud wala kaayo hatagi sa gobiyerno ang programa alang sa pamilya. Ang simbahan usab, minus ang ilang pag-agak sa panimay.
Mao unta ni ang angay tutokan sa atong gobiyerno kon unsaon pagpalambo sa matag pamilya nga magiyahan ang matag sakop ngadto sa maayong gawi.
Ang sekreto niana mao ra gyud ang pagdapit sa Ginoo diha sa panimay. Kon wala si Hesu-Kristo sa atong taliwa, siyempre ang kaaway maoy mobanos diha.
Busa dili gyud ta makapaabot og husay ug linaw nga komunidad o nasod hangtod dili dawatan sa matag usa nako, nga nagpatuo nga Kristiyanos kono, si Hesus Kristo.
Bisan kinsa pa ang presidenti ibutang sa Malacanang kon wala kining pagtagad sa pamilya nga mahadlokon sa Dios, dili ta makapaabot og kalamboan ug kalinaw.