DUHA ang patay sa gituohang binaslanay sa mga grupo sa mga durugista sa Barangay Punta Princesa, Dakbayan sa Sugbo.
Ang duha nga gipamusil patay sa managlahi nga mga oras target unta sa operasyon sa kapulisan sa Labangon Police Station.
Apan sa Martes sa buntag, girespondehan sa kapulisan ang duha ka mga pagpamusil.
Ang unang pagpamusil nahitabo sa Sityo sa Tuburan nga sakop sa Barangay Punta Princesa mga ala 1 sa kaadlawon.
Si Police Capt. Jonathan Dela Cerna, hepe sa Labangon Police Precinct, niila sa unang biktima nga si Ricardo Arias, 30, taga Sityo Tuburan.
Si Arias gipusil sa duha ka mga tawo sulod sa usa ka internet cafe nga sudlonon.
Sa pakisusi ni Police Corporal Julius Corneta, si Arias nagduwa og bingo samtang diha usab si Emilio Macabubud, 47, taga sityo Dakilang Pito.
Giingong nagkalalisay sila si Arias ug Macabudbud kabahin sa drugas apan, di masabtan sa nakadungog ang partikular nga gilalisan.
Nabungkag ang panagduwa dihang ang kauban ni Macabudbud niibot sa iyang armas ug gipusil si Arias. Naigo si Arias sa ulo hinungdan sa iyang kamatayon.
Pasado alas 6 sa buntag, laing insidente sa pagpamusil ang nadawat sa Labangon Police sa agianan nga lugar sa Sityo Tuburan.
Matod ni Police Staff Sergeant John Errick Samosa nasuta nga ang biktima mao si Macabudbud
Gisusi ni Samosa kon tinuod ba nga si Macabudbud nalambigit sa pagpatay kang Arias ug nakompirmar.Si Macabudbud naigo sa ulo nga miresulta sa hinanaling kamatayon.
Matod sa usa ka saksi nga si Macabudbud giduol sa nag-inusarang lalake dayon gipusil.
Nagtuo si Dela Cerna nga pagpanimawos ang motibo sa pagpatay kang Macabudbud.
Matod ni Dela Cerna nga away sa illegal drugs ang motibo.