MOHUNONG na sab ang nasod sud sa pipila ka mga oras kay motan-aw sa away ni Manny Pacquiao batok kang Ghanian Joshua Clottey.

Bisan gani ang mga rebelde ug sundawo mohunong man sa paggubat aron motan-aw ug moabiba kang Pacman.

Kanindot unta kon mahimo pa niya nga moaway kada adlaw aron way kagubot nga mahitabo sa Pilipinas. Apan di sab na niya mahimo tungod kay di siya Superman.

"The Manny Pacquiao Blog". Click here for stories and updates on the Filipino boxing champ.

Unta, dunay matang sa lider nga sama kang Pacman nga usa ka unifying factor. Tawo nga gitahod ug giila sa tanang sektor sa katilingban.

Wa na untay rebelyon ug panagbingkil sa nagkadaiyang pulitikanhong hut-ong.

Ang mga rebeldeng Muslim ug kumunista motahan na unta sa ilang mga armas aron mosalmot sa pagpalambo sa nasod.Wa na untay mapagan sa crossfire kon magpinusilay na ang mga sundawo ug rebelde.

Wa na untay mga pagduda sa mga motibo sa mga lider sa katinuoray ug katiunay sa ilang pagtimon ning nasod.

May mga paglaom na unta ang mga Pilipino nga mahaw-as gikan sa tumang kalisod kay maghiusa na man ang tanang sektor aron molambo ang nasod.

Ang nakapait kay hangtod karon, wa may lider nga maingon natong sama og epek ni Pacman ibabaw sa ring.

Kanus-a pa kaha makabaton ang atong nasod ning matang sa lider? Kon naa man, anha ra gyud tingali sa damgo. Ug damgo na lang sab nga maadunahan pa ang Pilipinas.