KASARANGAN ngadto sa makusog nga pag-ulan ang padayon nga masinati sa tibuok Sugbo Martes sa hapon, Disyembre 3, 2019, hangtud na sa Myerkules sa buntag, December 4, isip kabahin pa sa epekto sa Typhoon Tisoy.
Kini ang gibutyag ni Joseph Merlas sa buhatan sa Philippine Atmospheric, Geophysical and Astronomical Services Administration (PAGASA) sa Mactan, hinungdan nga gipahimangnuan ang mga lokal nga kagamhanan ug publiko nga dili gyud mokompyansa bisan pa man kon gilibkas na ang mga storm signal number sa tibuok Central Visayas.
Ang Pagasa Mactan ang nipagawas na og unom ka Thunderstorm advisory sukad Martes sa buntag.
Gipaubos na sad ang tibuok Metro Cebu sa Yellow Warning rainfall advisory ganihang alas 3:45 Martes sa hapon.
Sigon ni Merlas nga nagpasabot niini nga 7.5 millimeters ngadto sa 15 mm kon 37,500 ngadto sa 70,000 ka baril sa tubig ang mabubo matag kilometro kwadrado sa tibuok Metro Cebu.
Sukad alas 2:25 hangtud alas 3:40 nitala na ang buhatan sa Pagasa Mactan og 40 mm kon 200,000 ka baril sa ulan.
Hinungdan nga dili gyud kakompyansaan gikan sa mga pagbaha ug pagdahili sa yuta. (Superbalita Cebu)