SUBIC, Zambalaes - Siento porsyento na nga andam ang mga atletang Ormocanon nga midala sa Philippine Modern Pentathlon Team sa duwa nila sa Huwebes, Disyembre 5, 2019.
Ang Modern Pentathlon duwaon sa Subic, alas 9 sa buntag.
Matod ni Rex Dela Cruz, usa sa mga coach sa duwa, hapit usa ka tuig nila nga giandaman ang duwa sa Southeast Asian Games 2019.
Dugang ni Dela Cruz, gipadala usab ni Ormoc City Mayor Richard Gomez sa lain laing nasud ang mga player aron mahasa pag maayo.
“Taas gyod ang morale sa ato mga players tungod sa suporta ni Mayor kay gipadala sab ni sila sa lainlain nga lugar sa una aron gyod ma expose,” matod ni Dela Cruz.
Dugang ni Dela Cruz, unom ka mga medalya ang gusto nila makuha sa maong duwa.
Ang Modern Pentathlon dunay lima ka discipline: run, shoot, swim, equestrian jumping ug fencing. Pero ang duwaon lang karon sa SEA Games kay tulo lang ka discipline nga mao ang shoot, swim ug run.
Ang Team Philippines dunay walo ka players, upat ka mga lalake ug upat ka mga babaye.
Matod ni Dela Cruz nga sa laser run (kombinasyon sa shoot ug run), duha ka best players ilang pilion ug duha usab sa triathle (kombinasyon sa swim, shoot ug run).
Pero posible gihapon makaduwa ang walo ka mga atleta kay duna usay relay.
Nasayran nga 800 metros ang daganon sa mga atleta, 50 metros ang languyon ug dunay upat ka mga target sa shooting ug kaupat kini nila balik balikon.
Matod ni Dela Cruz nga medyo pressure sab sila nga makuha ang gold medals gumikan kay ang Pilipinas karon ang nag una sa tally nga pinakadaghan og gold medal.
“We are trying our best nga maka add up sa gold medals sa Pilipinas,” matod ni Dela Cruz.
Kampante hinuon si Dela Cruz nga makab-ot nila ang kampyonato gumikan kay kondisyon kaayo ug excited na kaayo ang mga atleta moduwa.
Ang duwa gisibog sa Huwebes gumikan sa di maayong panahon tungod sa bagyong Tisoy.