NAANGKON sa Dakbayan sa Mandaue ang kalainan nga naapil sa tulo nga pinakalabaw nga mga local government units (LGU) sa Digital Governance (eGov) Awards kabahin sa Customer Empowerment tungod sa pagsagop ug paggamit niini sa Guardian Emergency Response System.
Nadawat sa dakbayan niadtong Nobiyembre 26, Martes, uban sa mga dakbayan sa Makati ug Parañaque sa Philippine International Convention Center sa Pasay City human gipahibalo kini sa eGov governing body.
Gidawat ni Mayor Jonas C. Cortes ang pag-ila uban nilang city administrator Atty. Jamaal James Calipayan, iyang chief of staff Atty. John Eddu Ibañez, ug Cloyd B. Dedicatoria, CEO sa SugboTek, Inc., kaabag sa dakbayan nga mi-ugmad sa Guardian.
Nakadasig kini sa liderato sa dakbayan nga ipadali ang plano niini nga i-rollout ang Guardian sa mga gilumpong nga barangay sunod tuig, sugod sa Subangdaku, dayon sa Banilad, Basak ug Cubacub, mibutyag si Calipayan.
Usa ka programa sa Department of Information and Communications Technology (DICT), Department of Interior and Local Government (DILG) ug sa National ICT Confederation of the Philippines (NICP), giila sa eGov ang mga maayong gawi sa mga LGUs sa natad sa ICT.
Tiniman-an ang award nila ni DICT Secretary Gregorio B. Honasan II, DILG Secretary Eduardo M. Año ug NiCP chairman Jonathan Defensor de Luzuriaga sa government-to-customer (G2C) nga kategoriya.
Sa pagtanyag sa maong pag-ila, gikutlo sa eGov nga “nakita sa Mandaue ang panginahanglan nga matagaan og gahum ang mga (taga-Mandaue) nga makabaton og mas maayo ug mas madaling kadangpan kon manawagan og tabang, ug makaabag ang mga tagilungsod sa pagtaho og mga panghitabo nga matubag gilayon sa Dakbayan.”
“Nakita niini ang panginahanglan sa mas maayong pagpadala og mga tigtubag ug mga kagamitan, ilabina kon may dagkong mga nahitabo sama sa dakong sunog nga nga-task force alpha na, paglunop ug katalagman,” dugang sa mayor.
“Dako natong garbo nga sa atong pagpaningkamot nagbunga kini og pasidungog para sa atong pinalanggang dakbayan,” dason niya. (PR)