DEAR Papa Joe,
Palihug tambagi ko sa akong problema. Ako diay si Carlo, 20 anyos na ang pangidaron.
Ang akong problema kabahin sa among silingan sa among subdivision nga grabe ka palahubog. Unya kon mahubog, dayon ra ba siya og panghasi. Unya ra ba og mahubog, dali kaayo masuko kon suguon mi niya palit og imnonon nga di man namo siya amahan. Dayon ra ba siya og gulat nako nga dunggabon kay salig daw ko nga miyembro ko og fraternity. Iya daw ko panitan.
Plano nako gani nga mosulti sa among grupo para matagaan ko og proteksyon ug madisiplina sad ni siya. Unsa may angay nakong buhaton nga ang akong amahan mao man sad iyang kainom? Pero mao lagi, basta mahubog mangunay. Pero kon di hubog, buotan kaayo. Palihug tambagi ko.
Carl
Carl,
Ayaw na lang iapil ang imong grupo ana kay mosamot. Basin magmahay ra ka sa mahitabo unya. Naa man na imong papa, sultihi siya nga di maayo ang binuhatan sa iyang barkada kay basin mahinaykan mo o kamo maoy makahinayak niya kay di na baya mo gagmayng bata. Duna na sad moy kaisog mosukol.
Kon di man gani, mas maayo nga ipa barangay na nimo siya para mahusay na ug sa asosasyon sa inyong lugar. Basta kon kaya, mas maayo molikay para walay gubot. Ayaw isugal imong pagkatawo sa hanap na og kaugmaon. Daghang salamat.
Papa Joe
(sa inyong tampo ipadala sa papajoesuperb@gmail.com)