NAAPEKTUHAN ang ubang mga duwa sa 30th Southeast Asian Games sa pag-landfall sa Bagyong Tisoy sa southeastern part sa Luzon kagahapon.
Ang Philippine Southeast Asian Games Organizing Committee (Phisgoc) mianunsyo nga nauswag ang pagpahigayon sa ubang mga duwa ug gikompirmar kini sa SEA Games technical delegates ug competition managers.
Kadaghanan sa mga naapektuhan pulos outdoor events. Kini mao ang beach volleyball, shooting, skateboarding, underwater hockey, petanque, sepak takraw, canoe/kayak, muay ug surfing.
Ang mga venue ning maong mga duwa nahimutang sa Metro Manila ug Southern Luzon.
Taliwala sa pagpanghasol sa Bagyong Tisoy, ang kombati sa ubang sporting events nagpadayon.
Wala sab makapakgang ang bagyo sa maayong gipakita sa Pinoyng mga atleta nga padayong nanghakot og mga medalya sa ikatulong adlaw sa matag duha ka mga tuig nga kompetisyon.
Mga alas 3:30 sa hapon kagahapon, ang Pilipinas padayong ningsulbong sa medal tally ug nakatigom na kini’g 41 ka mga gold, 24 ka mga silver ug 15 ka mga bronze.
Nabiyaan og dako sa Pilipinas ang nahimutang sa ikaduhang dapit nga mao ang Vietnam, nga adunay 18- 24-18 tally. Naa sa ikatulo ang Indonesia nga adunay 11-14-13 tally.
Si Philippine Sports Commission (PSC) chairman William “Butch” Ramirez midayeg sa gipakita sa Pinoyng mga atleta sa nag-unang tulo ka mga adlaw sa kompetisyon.
“After almost three days of intense competitions, and with Team Philippines performing magnificently in the face of world-class foes, I would like to send my message of congratulations to all who fought valiantly to uphold national pride. You are all winners to us,” pamahayag ni Ramirez.
“We are riding on this positive wave and continue to hope that we can sustain this good performance.”
Si Ramirez mao sab ang deputy chef de mission sa Team Philippines nga nagtinguhang maangkon pagbalik ang overall title.
Katapusang nasakmit sa Pilipinas ang overall title sa kompetisyon niadto pang 2005 nga gipahigayon sab dinhi sa nasod.
Nasayod si Ramirez nga aduna pa’y taas nga panahon aron makagukod ang ubang mga nasod apan dako ang iyang pagsalig nga dili motugot sa atletang mga Pinoy nga mahitabo kini.
“We still have many days of battle ahead of us, but I remain steadfast in my belief in our national team. I know that they are intent on delivering pride and honor for the country,” asoy ni Ramirez.
“I again enjoin every Filipino, wherever you are in the world, let us all rally behind our national team. Let us continue to support and pray for their continued success.” Ang 2019 nga edisyon mahuman karong Disyembre 11. (RSC. ESL)