MISAAD si Cebuano mixed martial arts prospect Allan Albindo nga buhaton niya ang tanan aron makaposte og makapaukyab nga kadaugan sa iyang pagpakigbatok kang Indonesian Prince Toreq karong hapon sa One Warrior Series sa Singapore.
Si Albindo nagtinguha sa iyang ikaduhang kadaugan sulod sa tulo ka mga away ning maong promosyon.
Human siya nasubhan og kapildihan batok kang Manthan Rane sa India, ang 22 anyos nga si Albindo mibangon ug namungot kini batok kang Malaysian Arif Izzudin niadtong Agusto 6.
Kon modaog si Albindo batok kang Toreq, hayan moamag ang poruhan nga makapirma siya og kontrata sa ONE Championship, ang labing dakong MMA organization sa Asya.
“Importante kaayo ni nakong awaya. Nagdepende aning awaya ang akong kaugamon ani nga fight series,” matod pa ni Albindo, kinsa hugot nga nagbansaybansay sa Yaw-Yan ArDigma Cebu ug Atos Philippines Cebu.
Si Yaw-Yan ArDigma Cebu founder Master Benigno ‘Ekin’ R. Caniga Jr. dako ug pagsalig nga molampos si Albindo ning awaya ug nagtuo siyang dili makatiwas si Toreq. (ESL)