MANAGTIAYONG tiguwang nangapaig human maugdaw ang ilang balay didto sa lungsod sa Argao.
Nasayran ang kabomberohan sa lungsod nakadawat og alarma sa sunog alas 8:45 sa gabii niadtong Biyernes, sa Brgy. Langtad.
Si F01 Angelito Alcarez nga nahinabi sa Sun.Star Superbalita niingon nga ang alarma sa sunog ilang gibutang sa first alarm samtang nakontrolar sulod lang sa singko minutos.
Base sa imbestigasyon ang nasunog nga balay iya ni Alberto ug Lydia Alcazaren.
Ang ilang balay gihimo lang sa light materials sama sa amakan hinungdan nga dali kaayong nidako ang kayo. Samtang naglisod usab ang kabomberohan sa pagsud tungod sa kasudlonon sa nahimutangan sa ilang balay.
Dako na kaayo ang kayo sa dihang niabot ang mga bombero hinungdan nga wa na nila matabang.
Hinuon way laing balay ang naapil sa sunog apan ang managtiayon wa na makagawas atol sa hitabo.
“Napaig nga naggakos man silang duha sa dihang among nakit-an didto,”asoy ni F01 Alcarez. Nasayran ang manag-tiayon way mga anak ug way paryente.
Basi sa pasiunang imbestigasyon posebling nagpaaso ang managtiayon sulod sa ilang balay aron pag wagtang sa lamok.
Sigun sa ilang nasayran nga niadtong miaging tuig hapit na usab nasunog ang maong balay apan natabang lang sa mga silingan.
Kini tungod gihapon kay nagpaaso.“Pero mora naman gud ni silag giango-ango na ba tungod sa katiguwangon. Mao nang magdaob sulod sa balay,” dugang ni Alcarez.
`Gibanabana nga mokabat sa P20,000 lang ang danyos sa sunog. (DRT)