NAGPAKATAP og double-double nga 29 puntos ug 15 rebounds sulod lang sa 22 ka mga minutos nga pagduwa si Giannis Antetokounmpo aron pangulohan ang hosts Milwaukee Bucks sa pagmasaker sa New York Knicks, 132-88, kagahapon sa National Basketball Association (NBA).
Ang Bucks, nga ningsaka sa 18-3 nga rekord, ningposte sa ika-12 nilang sunodsunod nga kadaugan diin ilang gilubong og 40 puntos o labaw pa ang katapusan nilang duha ka mga kontra.
Sa kasaysayan sa Bucks, mao kini ang labing unang higayon nga nakaposte sila og duha ka sunodsunod nga kadaugan nga naglabaw sila og 40 puntos o labaw. Gipanglubong og 41 puntos sa Bucks ang Charlotte Hornets sa miagi nilang duwa.
“I don’t feel we came in here with the idea we could beat this team,” matod ni New York coach David Fizdale. “That is what was most disappointing. They got whatever they wanted, whenever they wanted. We never took a real stand.”
Ningburot pa ngadto sa 47 puntos ang labaw sa Bucks sa pagpangulo ni Antetokuonmpo, kinsa nilangkat sa iyang ika-10 nga rebound sa nahabiling 4:43 minutos sa 2nd quarter aron iposte ang iyang ika-20 nga double-double sa season.
Si Antetokuonmpo, kinsa maoy kasamtangang MVP, mibiya sa duwa sa nahabiling kapin sa upat ka mga minutos sa 3rd quarter diin niadtong mga gutloa, taga liog na ang labaw sa Bucks, 93-54.
“I watch and listen to him lead his guys,” pagdayeg ni Fizdale kang Antetokuonmpo. “He’s just impressive. The league is in good hands, I know that, when you’ve got a guy like that at the top.”
Gawas kang Antetokuonmpo, ang Bucks aduna pa’y laing lima ka mga magduduwa nga nakamugna og dobleng numero nga puntos.
“I think everybody shows up every day and they’re hungry,” matod ni Antetokounmpo.
“Nobody relaxes. We show up and do our job. We smile; we’re having fun about it and it’s nice. Usually teams tend to relax, but we don’t do that.”
Ang Knicks, nga nahagsa sa 4-17 nga rekord, nagkagidlay na sa sayong bahin pa lang hinungdan nga nabiyaan na dayon sila og dako human sa 1st quarter, 15-33.
Wala na nakabangon pagbalik ang Knicks gikan niadto.
Sa laing mga duwa, ningdaog ang Atlanta Hawks batok sa Golden State Warriors, 104-79, Philadelphia 76ers batok Utah Jazz, 103-94, Phoenix Suns batok Charlotte Hornets, 109-104, Indiana Pacers batok Memphis Grizzlies, 117-104, ug Chicago Bulls batok Sacramento Kings, 113-106. (AP, ESL)