UPAT ang nangamatay, tulo niini mga menor de edad human madasmagi sa usa ka sakyanan nga natangtang ang ligid samtang sila nagbilar sa gihaya sa lungsod sa Tuburan.
Ang drayber nga anak sa barangay kapitan daling nisibat human giingong giluoy sa mga kabanay.
Apan nitahan ra sab kagahapon sa buntag.
Samtang sa siyudad sa Toledo, usa ka timekeeper namatay human madasmagi sa bulldozer sulod sa Carmen Copper Corporation, sa Barangay Das, Toledo City.
Ang namatay giila nga si Florante Labra, 23,taga barangay Sangi.
Si Labra namatay human madasmagi sa bulldozer nga gimaniho ni William Selisana, niadtong Biyernes pasado alas 5 sa buntag.
Samtang sa lungsod sa Tuburan, pasado alas 7:00 sa gabii niadtong Biyernes, laing aksidente ang nahitabo sa may highway sa Brgy. Fortaleza.
Matod sa kapulisan nga usa ka yellow Nissan Frontier nga gimaniho ni Anthony Sayson Cabintoy, 26, natangtangan og ligid sa atubangan ug tuong bahin samtang nagdagan.
Hinungdan nga nalahos kini sa mga tawo nga nagbilar nga nanglingkod kilid sa karsada.
Nibangga pa pa kini sa usa ka motorsiklo nga nag-parking kilid sa karsada.
Nihunong lang ang sakyanan human nabangga ang maong sakyanan sa usa ka punoan sa kahoy.
Human sa hitabo namatay diha-diha si Janine Recta Oros, 10, samtang laing pito nga mga angol ang daling gidala sa Tuburan District Hospital sakay sa usa ka bus nga naagi sa lugar.
Apan samtang nagpaingon sa tambalanan ang bus, nangamatay sila si Janine Mag-aso Tajanlangit,7, Jessica Sayson, 14, ug Levi Tail, 34.
Ang laing tulo gibalhin sa tambalanan sa dakbayan sa Sugbo samtang ang laing usa nga si James Diola Gecain, 10, nagpabilin sa tambalanan didto sa Tuburan.
Si Cabintoy nisakay pa og apil sa bus aron kuyogan usab ang iyang ugangan ug laing 5 anyos nga bata nga iyang kuyog kay nangaangol usab.
Apan gumikan sa kahadlok nga pasakitan siya sa mga paryenti nga nakaila kanila nga siya ang drayber sa sakyanan, napugos siya sa pagkanaug sa bus ug nisibat.
Si Chief Insp. Timmar Alam, hepe sa Tuburan Police Station nga nahinabi sa Sun.Star Superbalita, niingon nga nipahigayon silag hot pursuit operation aron masikop ang drayber.
Gani niabot usab sila sa balay ni Cabintoy sa barangay Carmelo ug sa balay sa iyang inahan nga si Kapitan Alice Cowley sa Barangay Colonia.Apan wa kini nila makit-i.
Kagahapon pasado alas 10:00 sa buntag si Cabintoy nitahan sa police station uban sa barangay tanod nga uyoan sa iyang asawa.
Gipasabot ni Cabintoy nga wa siyay planong mosibat.
Apan nitago siya tungod sa kahadlok nga pasakitan sa mga paryente nga posebling nangita kaniya.
“Gitabangan kuno siyag luok sa bus, mao nang minaog na lang siya ug nidagan. Grabe kuno kasuko ang mga paryente,”matod pa ni Alam.
Matod ni Cabintoy nga hinay ra ang iyang dagan niadtong higayona ug mao usab kini ang pamahayag sa mga nakasaksi. Kagahapon, siyanisuway sa pagpakig-areglo sa mga paryente sa mga biktima, apan si Alam nipahibawo nga magpadayon ang ilang kasong ipasaka nga reckless imprudence resulting to multiple homicide, ug multiple physical injuries and damage to property.