SA NAGKADUOL na nga kasaulogan sa Pasko, daghan usab nga mga kabataan ang nagpalimos sa kadalanan, hinungdan nga gipahimangnoan ang publiko sa dili paghatag sa bisan unsa nga donasyon o hinabang.
Gi-aghat ang katawhan sa dakbayan, ilabi na sa mga manggihatagaon, nga dili mohatag og bisan unsa diha sa mga street kids o kabataan nga gapangayo sa kadalanan, mga walay panimalay ug uban pa.
Nasayran nga gipatuman sa City Social Welfare and Development (CSWD) ang Presidential Decree (PD) 1563, o Anti-Mendicancy Law, diin nagdili paghatag og donasyon o bisan unsa sa mga ubos ang estado sa kinabuhi diha sa kadalanan kini tungod kay nag-aghat lamang kini kanila sa paghimo niini matag adlaw ug dili na mangita og insaktong panginabuhian hangtod nga modako.
Gawas pa niini, delikado kaayo kini sa mga kabataan diha sa kadalanan ilabi na kung simbako mangaligsan.
Adbokasiya kini sa dakbayan sa Cagayan de Oro ug gipanghingosgan ang kampanya batok niini, gani gilusad ang mga programa sa siyudad lakip na ang mga rescue operation sa mga kabataan.
Gibutyag ni Vice Mayor Rainier Joaquin Kikang Uy nga ihatag lang ang mga donasyon sa mga insaktong ahensiya.
"Kung mahimo, didto sa sakto nga offices or authority nga kung naay ihatag, didto nalang gyud i-donate para dili mahimo nga kita nay magtolerate nga diha sa dalan," matud ni Uy.
Giingong dunay mga buhatan ug ahensiya nga andam mga modawat ug mag-atiman sa mga donasyon aron nga makapaingon ang mga hinabang sa mga katawhan nga nanginahanglan.
Gidugang pa nga sayop ang paghatag og hinabang diha sa kadalanan.
"Dili na lang mohatag, malooy man ta pero unsaon ta man, sayop man sab nga diha ta mohatag sa dalan," dugang pa.