SUPERBALITA CAGAYAN DE ORO

Drayber gibirahan, patay

ONSE ka mga samad ang naangkon sa drayber human gipusil ug gitoohang gidunggab kagahapon, Disyembre 3, mga alas 4:30 sa crossing sa P.N Roa, Canitoan, siyudad sa Cagayan de Oro.

Patay si Ronald Cuizon, 42, minyo ug drayber sa Talakag liner, kinsa residente sa Phase 2B Calaanan, Barangay Canitoan.

Sa impormasiyon nga nahipos gikan sa Police Station 7 (PS7) sa Bulua, gikabutyag nga nagmaneho niadtong higayon si Cuizon dihang kalit nga gipusil sa wala mailang suspek.

Nitumaw ang taho nga nakamotorsiklo ang responsable ug gidikitan ang biktima apan padayon pa kini nga gisuta sa kapulisan.

Gibutyag ni Police Major Aldren Baculio, hepe sa PS7 sa Bulua, nga nagpahigayon pa ang ilang buhatan og imbestigasiyon ilabi na nga dunay tulo ka mga pasahero ang sakay niini nga posibleng nakakita sa panghitabo.

Gikompirma niini nga anaa sa 11 ka mga samad ang naangkon sa biktima apan dili pa masuta kung pila ka samad pinusilan ug dinunggaban.

"Base sa ingon sa doctor didto, dili pa ma determined unsa nga klase sa samad naa daw 11 ka samad," pahayag ni Baculio.

Sa pakighinabi sa usa sa mga silingan sa biktima, giingong nalambigit kini sa ilegal nga druga.

"Ga-druga man na gibadlong na bitaw na sauna. Tunog naman kaayo na siya sa among barangay. Ninglayas na man na sauna," pahayag sa wala nagpailang silingan.

Samtang gibutyag sa pamilya nga blangko sila sa motibo sa suspek sa pagpatay sa biktima apan gipanghimakak nga nalambigit sa bisan unsa nga ilegal nga kalihokan ug wala usab kini kabingkil.

Dili pa usab makompirma sa kapulisan ang maong alegasiyon ug gisuta pa ang motibo sa krimen lakip na usab ang alegasiyon nga pagkalambigit sa ilegal nga druga.

Sa pagsulat niini nga balita, kasamtangang gi-atiman na sa nahabiling pamilya ang patay nga lawas sa biktima.

Gi-aghat usab sa kapulisan ang mga nakasaksi nga maghatag og impormasiyon aron nga mas mapadali pa ang pag-ila sa suspek.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph