GIKAN sa paghiabot sa mga atleta sa nagkadiayang nasud dinhi sa Pilipinas hangtud nga opisyal na nga gisugdan ang Southeast Asian (SEA) Games 2019, managlahi ang opinyon sa katawhan.
Dunay nagsaway sa ginagmay nga palpak sa preparasyon, duna say mga nagdayeg sa kanindot sa pasundayag sa pagbukas sa SEA Games niadtong Sabado, Nobyembre 30.
Gani, ang akong mga higala sa Facebook nag-iyahay og padayag sa ilang kasuko sa mga tawo nga nakasaway sa organizing committee sa SEA Games.
Natural ra natong mga Pilipino ang pagkahinawayon. Libakon man gani nato ang paryente, unsa na kaha ang laing tawo?
Pero sa akong bahin, mosaway ko sa gobyerno kung dunay palpak sa ilang gihimo. Apan, modayeg sab ako sa mga nindot nga programa alang sa katawhan.
Nasakitan man gud ang pipila nga grabe kaayo ang paghigugma sa gobyerno mao nga masuko sila kung dunay mosaway niini.
Isip mga sakop sa media, natural lamang nga magduha-duhaon (skeptical) kita sa mga propaganda sa managlahi nga kampo. Busa, ato gayud kining tukion og maayo ang mogawas nga mga isyu.
Sa hisgutanan nga palpak nga preparasyon sa SEA Games, di nato malilong ang yangungo sa mga langyaw nga atleta.
Kamatuoran niini ang pahayag ni Pangulong Rodrigo Duterte sa CNN Philippines usa ka adlaw sa pa gisugdan ang SEA Games nga nagkanayon: “You cannot just cast away all those, the discomfort, the sufferings of the athletes... sleeping on the floors, waiting for so many hours, getting hungry... This might really be a small matter but you just cannot flick your fingers, ‘Ah, maliit ’yan.’”
Dugang pa sa pangulo, “I’m really apologizing for the country. But then again I said they should know while they are still here that government is not happy with it and that their president, the president of the country where they are playing, has ordered... an investigation.”
Sa pamahayag pa lamang sa pangulo, nagpasabot kini nga duna gayu'y kakulangan ang organizing committee nga gipangulohan ni Speaker Allan Peter Cayetano nga nabantayan di lang sa mga mamamahayag dinhi, apan lakip na mga news organizations sa laing nasud.
Sa nahitabo, mabasol niini si Cayetano nga chairperson sa Philippine SEA Games Organizing Committee (Phisgoc), angay manubag sa gitakda nga imbestigasyon?
Sa laing bahin, samtang nagpadayon pa ang panagtigi sa atong mga atleta, ato silang suportahan pinaagi sa pag-ampo nga magpadayon ang pagpanghakot og bulawang medalya sa SEA Games.