I-UNA nako ang akong personal nga pahalipay ni Justice Edgardo delos Santos nga bag-o pa lang natudlo isip Associate Justice sa Supreme Court.
Si Justice Edgardo delos Santos mao ang kasamtangan nga Court of Appeals Executive Presiding Justice sa Court of Appeals sa Cebu.
Giplano ang iyang oath-taking karon, Miyerkules, Nobiyembre 4, sa Malacanang apan mihangyo si Justice delos Santos nga adto lang sa Huwebes o Biyernes pagahimoon ang maong oath-taking aron makatungha sab sa seremonyas ang iyang asawa ug mga anak.
Tungod sa bagyong Tisoy, kanselado ang mga biyahe sa eroplano padulong ug gikan sa Manila og kasamtangan sab nga nagdaot ang panahon.
•••
Sa akong pagkukabildo sa mga beterinaryo sa mga lungsod ug sa mga probinsiya sa atong rehiyon 7, akong nahibaw-an nga dili pa gyod diay hipno ang atong pagpangandam sa kampanya batok sa African Swine Fever (ASF).
Hangtod karon, wala pa diay mga himan ang atong mga beterinaryo sama sa protective clothing/gear, apil na ang mga kemikal nga gamiton kon pananglit makasulod gyod sa atong rehiyon ang ASF.
Buot ipasabot, mangita pa sila og kwarta unya mag-bidding pa aron makapalit sa maong mga importanteng himan.
Susmariosep.
•••
Unsa kadugay mogawas ang pundo sa gobierno alang sa maong emerhensiya? Madugay gyod, matod sa usa ka agriculturist sa probinsiya.
Gani, sa among probinsiya, dugay na nga mideklarar ang Probinsiya og state of calamity apan hangtod karon, wala pa gihapon mogawas ang pundo alang sa maong emerhensiya.
Taas baya kaayo ang proseso aron mogawas ang resolusyon sa sanggunian alang sa pagdeklarar og state of calamity, dugang pa niya.
Kon mao kini ang basehan aron makapalit ang LGU og dinalian nga mga himan alang sa ASF, dili gyod kini kasaligan nga pamaagi, panapos pa niya.
•••
Unsay maayong paagi aron maseguro ang suporta sa backyard raisers kon pananglit dunay positibo nga resulta sa ASF?
Hatagan sila og “options” kon hiposon ug patyon gyod ang ilang mga baboy.
Pananglit, kon dunay andam na nga pundo, bayran dayon sa husto nga kantidad ang mga apektadong backyard raisers.
O kaha, dugang pa niya, mahimo sab nga imbes magbuhi og baboy, lain na lang ang ilang buhion, manok, baka o kaha, kanding.
Himuon kini aron dili usa magamit ang ilang mga baboyan.
Kon dili kini buhaton, unya walay laing mahimo ang mga backyard raisers, hayan mangita silag paagi nga mahalin gihapon ang ilang mga baboy bisan pa sa mga hangyo nga patyon dayon kini aron dili na makatakod.
Kasagaran kanila, nang-loan aron ipuhunan sa negosyo. Angayang sabton sa kagamhanan.