ANAA sa talandugong kahimtang sud sa ospital ang usa ka barangay kagawad human pusila sa wala mailhing mamumuno alas 7:20 sa buntag Martes, Disyembre 3, sa Barangay Magugpo South, Tagum City.
Ang biktima nailhang si Ananias Antipas Brobo, 53-anyos, minyo, kagawad sa Barangay Magugpo South ug residente sa Purok Orange, Valley sa maong barangay.
Migula sa imbestigasyon sa kapulisan nga sakay ang biktima sa motorsiklo padung sa Barangay Magugpo South apan gitaparan kini sa mamumuno nga naka-motor dayon gipusil.
Wala naintimano ang biktima kinsa nakapadagan pa sa iyang motorsiklo padung sa mga tawo sa dapit ug nagpatabang nga dalhon siya sa Davao Regional Medical Center.
Sa crime scene, upat ka mga bala sa kalibre .45 nga pistola ang narekober sa kapulisan.
Blangko pa ang kapulisan sa tinuod nga motibo sa krimen apan nagduda sila nga personal kini nga bangi.
Ning kasamtangan, padayong nagpaalim sa ospital ang biktima samtang ang Tagum City PNP mihimo og makuting imbestigasyon sa kaso. (Jeepy P. Compio)