SIKOP sa Bunawan Police Station ang usa ka lalaki kinsa nagpailang bodyguard sa founder sa Kapa - Community Ministry International Inc. nga si Pastor Joel Apolinario.
Ang suspek mao si Edilberto Naupan, 44-anyos, taga Bislig, Surigao del Sur kinsa miagi sa Task Force Davao checkpoint sa Licanan, Bunawan District alas 9 Martes sa buntag, Disyembre 3, sakay sa usa ka behikulo nga Isuzu MUX.
Sumala ni Major Noel Villahermosa, hepe sa Bunawan Police Station, nga girekisa ang sakyanan sa suspek diin nakita ang daghang mga bala ug armas.
Dihang gipangitaan og papeles, wala kini gikapakita, hinungdan nga natahap ang kapulisan ug girekisa pag-ayo ang ubang dapit sud sa sakyanan.
Sa likod sa sakyanan, nakita ang daghang binandol nga kuwarta nga mokantidad og P4 milyones nga suma sa suspek iya kuno nga payout sa Kapa.
Gisulayan pa og hatag og kuwarta sa suspek ang usa ka pulis nga mirekisa kaniya aron di na siya dakpon apan wa kini misaler.
“Gikan siya og Surigao, ang money pod gikan didto ingon niya payout daw niya sa Kapa, ug positive base sa atong pagsubay ug sa iyang giingon nga siya bodyguard sa Kapa founder,” ingon ni Villahermosa.
Usa kini ka joint operation sa Bunawan PNP ug Task Force Davao.
Ning kasamtangan, gisubay pa sa kapulisan sa Bunawan PNP ug sa National Bureau of Investigation (NBI-Davao Region) ang nasampit nga hitabo aron mapasakaan og kasong syndicated estafa ang nahisgutan.