Editoryal: Alerto sa NDRRMO

Editorial cartoon by Ariel Itumay
Editorial cartoon by Ariel Itumay

LISOD matagna ang mangtas nga lihok sa panahon. Kalit mausab nga dili mamatikdan bisan sa labing modernong kahimanan. Mao nga popular ang pulong nga ‘pagbanabana o estimate sa dagan sa panahon’ sa mga batid sa siyensiya. Walay hingpit makatagna. Dunay limitasyon ang pangutok sa tawo sa pagkakaron.

Apan ang tawo gihatagan og pangutok sa Magbubuhat aron makabalanse ug maghunahuna og mamugnaong lakang aron kaminosan ang epekto niini sa tanan o kinabuhi. Mao kini hinungdan nga natukod ang mga weather bureau ug risk management offices isip tubag sa dili kapugngang mga trahedya sa kinabuhi.

Sa pagkakaron, ang pagpaniid sa panahon nagkataas apan kinaiyahan nagkabuang usab. Sumala sa mga batid, epekto kini sa climate change. Ang mga kalihokan sa pag-umento sa sibilisasyon ug polyusyon nakapabuslot og dako sa ozone layer, bahin sa kawanangan nga nagsala sa tumang kainit sa silaw sa adlaw o ang ultra violet rays.

Resulta niini ang pag-init sa kalibotan. Dakong hinungdan sa climate change. Mas mangtas nga bagyo. Kalit nga pag-usab-usab sa dagan sa panahon. Ang mga bag-ong kahimanan ug ekipo nag-apas sa pagbanabana.

Apan ning tanan, mas masaligan gihapon nato mao ang batakang mantra - ang pagpangandam, personal ug katilingbanon. Ug kini ang dakong papel sa National Disaster Risk Reduction Management Ofice (NDRRMO) uban sa iyang mga sanga sa lalawigan, siyudad ug kalungsoran.

Mapasalamton kini sa kagamhanan sa nagtaas nga serbisyo sa NDRRMO. Matag karon-ug-unya, naghatag kini og real time updates nga awtomatik nga mo-alerto sa atong mobile gadgets sa dautang panahon o katagagman, sama sa ulahing bagyong Tisoy. Wa kitay gahom sa pagsanta sa lihok sa kinaiyahan apan, gihatagan og pangutok sa kahitas-an sa paghimo og mamugnaong lakang sa kaluwasan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph