ANG labing una nga Malasakit Lounge sa Land Transporation Office (LTO) nga anaa mahimutang sa Central Visayas plano nga himuong Malasakit Learning Center subay sa suporta nga gihatag sa Department of Information and Communications Technology niini.
Gihangop ni LTO 7 Regional Director Victor Caindec ang padayon nga suporta nga gihimo sa DICT alang sa labing una nga Malasakit Lounge sa LTO.
Kagahapon, Martes, Disyembre 3, pormal na nga gitunol sa Tech4ED ang computers alang sa Malasakit Lounge sa buhatan sa LTO 7.
Ang Tech4ED proyekto ubos sa buhatan sa DOST-ICT diin tumong niini ang mahatagan og kaalam ang publiko sa Information and Communications Technology.
Karon, ang Tech4ED anaa na ubos sa ahensiya sa DICT nga maoy nag-implementar sa paghatag og libre nga moderning teknolohiya susama sa computers.
Ang Tech4ED o Technology for Education, to gain Employment, train Entrepreneurs towards Economic Development, di lang computers ang gihatag apan, aduna na’y mga e-learning contents ang nasukip sa matag computer.
Lima ka mga computer ang ilang gitunol ngadto sa LTO 7. Magamit kini ni bisan kinsa nga mobisita sa LTO 7 Malasakit Lounge.
“LTO is no longer just about an agency that is issuing licenses or registrations. It is now a participant to building a stronger nation, and i think that’s very important milestone. And of course, we could not do that without our partner agency, DICT,” matod ni Caindec.
Ang Malasakit Lounge sa LTO 7 anaa mahimutang sa Natalio Bacalso avenue, dakbayan sa Sugbo.
Ang program manager sa Tech4ED nga si Amelia Dean niingon nga daghan ang mamahimong magamitan sa computers nga ilang gipanghatag.
Plano usab nila nga aduna’y online certification program isip lakip sa ilang proyekto nga Tech4ED.
Dugang ni Dean nga malaumon siya nga kining Malasakit Lounge sa LTO 7 sundon sa ubang mga rehiyon ingon man LTO sites.
Lakip sa nitambong sa launching si DICT 7 Regional Director Leo Cipriano Urbiztondo Jr.