GI-APORAN ni Lapu-Lapu City Mayor Junard “Ahong” Chan og tag P5,000 ang 50 ka mga board passers sa nagkadaiyang exam karong tuiga nga pulos mga Oponganon.
Gawas niini, laing P100,000 ang gihatag ni Chan ni Mikhael Glen Lataza, kinsa mahimong Top 1 sa Electrical Engineering Exam niadtong buwan sa Agusto ug laing P30,000 usab ang nadawat ni Lawrence Dane Balili nga nasulod sa Top 8 sa Naval and Marine Engineering exam niadtong buwan sa Oktubre.
Ang naasoyng pagpang-apod-apod ni Chan og cash assistance sa mga board passers ug topnotchers pinasubay sa resolusyon 14-2138-2017 ug ordinandasahon 14-095-2017 nga napasar sa konseho sa dakbayan.
Moabot sa P380,000 ang kinatibuk-ang nahatag ni Chan sa mga board passer ug topnocthcer.
An dakbayan sa Lapu-Lapu mao ray bugtong syudad sa lalawigan sa Sugbo nga maghatag og pahalipay sa matag tinun-an nga mopasar sa licensure examination isip paghatag bili sa ilang kakugi ug paghatag og dungog sa siyudad.
Ang mga nakadawat og pahalipay gikan sa kagamhanan mao ang mga propesyon sama sa Mechanical Engineer,Criminology, Physician, Electrical engineer, Nurse, Architect, Pharmacist, Naval architect ug Marine engineer, Nutrition Dietitian, Aviation Maintenance Tech, Master Electrician ug mga Professsional Teacher nga maoy kadaghanan sa nakadawat sa cash assistance.
Gawas sa mga board passers ug topnothchers gitagaan usab ni Chan ug pahalipay gikan sa iyang personal nga bulsa ang duha ka mga Oponganon nga mipakita og maayong buhat sa milabayng mga semana nga sila si Olibert Estillone ug Alfredo Baylon.
Si Estillone kinsa usa ka gwardiya miuli sa binandol nga P200,00 nga nahabillin sa usa ka pasahero dihang nag-inspeksyon kini og sakyanan sa J Park Island Resort diin siya nangalagad niadtong Nobiyembre 26.
Samtang si Baylon nga usa usab ka tricycle driver miuli sa usa ka mahalong Iphone nga nahabilin sa iyang pasaherong langyaw niadtong Nobyembre 25.
“I’m very thankful to Alfredo sa iyang gipakita ngadto sa paris nga langyaw, maayong pamatasan sa mga drayber nga Oponganon,” matod ni Chan. (GCM)