WALA mo-saler ang anting-anting sa kawatan og motorsiklo ngadto sa mga pulis sa dihang gidakop kini atol sa usa ka follow-up operation.
Matod pa nga si Michael James Bontilao nga taga Tubod, Barangay Dunggo, lungsod sa Dumanjug, gidungog nga adunay gahum gikan sa botelyang gamay nga dunay sulod linukot nga papel nga may sulat nga linatin ug ingon man lana.
Apan sa gihimong operation sa kapulisan nga pinangulohan ni PMaj. Aredioleto Cabagnot, hepe sa Dumanjug Police, ug inabagan sa mga residente, niadtong alas dos sa hapon sa niaging adlaw. si Bontilao way nahimo aron unta pagluwas sa iyang kaugalingon.
Nasayran nga usa ka Stephanie Pahuway Burasca, 24, nga molupyo ra usab sa maong barangay, mireklamo sa ilang buhatan kalabot sa pagkawala sa ilang motorsiklo pasado alas 9 sa gabii sa Dominggo.
Matod pa ni Burasca nga wala gyud sila makamatikod og kasikas o saba sa gawas sa ilang balay niadtong panahona bisan pa man gani og dunay mga iro sa gawas.
Gikahibulong kini nila og dako kay sagad niini dali ra man unta sila makamatikod kon dunay mga tawo nga moagi sa ilang dapit.
Nabantayan na lang nila nga nawala ang motorsiklo sa dihang nigawas ang iyang kapuyo ug didto iyang nakita nga wala na kini sa gibutangan niini.
Wa usab dayon sila maglangan ug ila kining gipahibawo ngadto sa kapulisan kinsa mihimo usab og dinaling follow-up operation.
Gibutyag ni Cabagnot nga nakakonpiskar sila og usa ka botelya sa hawak ni Bontilao nga may sulod nga papel linukot nga aduna usay nakasulat niini.
Sa ilang imbestigasyon, giangkon ni Bontilao nga kadto maoy iyang habak diin kon mosaka na siya sa usa ka balay, dili makabantay ang mga tagtungod niini.
Subay niini, usa ka residente ang mitumbok kang Bontilao nga mao usab ang nagkawat sa iyang motorsiklo niadtong Nobiyembre 26 sa ala una sa kadlawon sa Barangay Manlapay sa mao gihapon nga lungsod.
Kasong kalapasan sa R.A o Anti Carnaping Law ang ipasaka batok ni Bontilao.
Samtang laing kawatan ang nadakpan sa Dumanjug Police niadtong Martes ala una sa kadlawon. Pinaagi sa CCTV, positibong nailhan, si Charles Solidad, 28, taga Barangay Guadalupe, dakbayan sa Sugbo, nga maoy mikuha sa kapin P500 niadtong Lunes sa hapon sa usa ka parlor nga anaa nahimutang sa Barangay Tangil.
Misulod ang suspek sa maong parlor ug nakahigayon kini sa paglipat sa mga tawo nga mikuha sa kuwarta ug dayon sibat. Si Solidad nadakpan sa gihimo nga follow-up operation. (BBT)