PATAY ang usa ka kanhi traffic enforcer nga babaye human kini madasmagi og motorsiklo niadtong Lunes sa gabii, Disyembre 2, sa M.C.Briones St. Guizo, Mandaue City.
Giila ang biktima nga si Benjie Ruales, 57, taga Marpa, Brgy. Bakilid, sa maong siyudad ug kanhi traffic enforcer sa panahon pa ni Mayor Luigi Quisumbing.
Matod ni PSSms Melvin Leones, sa Traffic Group of Mandaue City Police, nga mga 7:15 sa gabii niadtong adlawa sa paghitabo, si Ruales paingon na molabang sa pedestrian dapit sa Metrobank sa Maguikay, apan aksidente kining nadasmagan sa motorsiklo nga gimahino sa usa ka Jessan Tabudlong, 26, taga Lugan, Consolacion.
Gituohan nga kusog ang dagan sa ni Tabudlong paingon sa norteng bahin sa Sugbo.
Nagtuo ang kapulisan nga wala makabantay si Tabudlong sa paglabang sa biktima tungod sab sa kangitngit sa maong dapit ilabi na nga nag-uwan-uwan niadtong gabhiona.
“Tsansang wala niya nakita, nya kusog sad iyang padagan nya nabulaga guro siya kay ngitngit man sad nang lugara,” asoy ni Leones.
Daling miresponde ang kapulisan, ug gidala ang biktima sa Mandaue City Hospital apan gideklara kining dead on arrival.
Ang suspek nga nagrabihan usab nadala pa sa Vicente Sotto Memorial Medical Center ug anaa karon sa talandugon nga kahimtang.
“Karon ang suspek kay 50/50 sad with serious physical injury kay iyang nawong man kuno ang nagrabehan tungod sa impact niya pag-down siguro niya namomo,” diugang ni Leones. (KFD)