SUPERBALITA CEBU

Wa nay storm signal sa Cebu; klase balik na

TISOY: Usa ka hamtong babaye nanguhag seaweeds sa baybayon sa Pooc, Talisay City nga nadala sa dagkong mga bawod tungod sa hinungaw sa bagyong Tisoy. (Alex Badayos)

MAAYO nga panahon na ang masinati sa mga Sugbuanon sugod sa Miyerkules, Disyembre 4, human layo na ang bagyong Tisoy nga maoy nagdala og dag-om ug uwan.

Samtang dagko nga mga barko nakabiyahe na sugod sa Martes human gilibkas na ang storm signal warning sa Sugbo ug Central Visayas.

Sa alas 8 sa Martes sa buntag dihang gilibkas na sa Philippine Atmospheric, Geophysical and Astronomical Services Administration (Pagasa) ang storm signal warning sa Metro Cebu samtang alas 11 sa buntag usab gilibkas na ang storm signal warning sa Northern Cebu.

Matod ni Pagasa Visayas officer-in-charge Engr. Al Quiblat nga bisan kon wala na gipaubos sa storm signal ang Sugbo ug Central Visayas apan, nakasinati gihapon kini og pag-uwan o bati nga panahon nga hinungaw sa bagyo.

Gikatakda nga mogawas sa Philippine Area of Responsibility si bagyong Tisoy, Miyerkules sa gabii o buntag sa Huwebes.

Aduna nay init nga panahon nga masinati sa Sugbo sa Miyerkules apan, kon aduna’y pag-uwan, localized thunderstorms na lang kini.

Klase na

Gipahibawo ni Gobernador Gwendolyn Garcia nga mobalik na sa regular nga klase ang mga tinun-an sa probinsya sa Sugbo human gilibkas na sa Pagasa ang storm signal sa Kabisay-an.

Mamahimo na usab nga makabalik ang mga residente nga mibakwit niadtong Disyembre 2, 2019 subay sa kamandoan sa Provincial Disaster Risk Reduction and Management Office (PDRRMO).

Base sa uwahing datos sa PDRRMO may 1, 488 ka mga pamilya o 7,376 ka mga indibidwal ang mibakwit nga gipahigayon usab sa 58 ka mga barangay sa probinsya.

Lakip sa una nang mibalik sa kaugalingong kabalayan ang mga residente sa Carmen, Medellin ug Bantayan nga maoy pipila sa mga dunay labing daghan nga evacuees. (HBL, ANV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph