GUSTONG suspensohon ni Cebu City Mayor Edgar Labella ang pagkuha og P5,000 gikan sa yearly allowance sa tanang mga mangtutudlo sa pampublikong tunghaan sa Siyudad sa Sugbo karong tuiga.
Kini mao ang gibutyag ni Raddy Diola, representante ni Labella sa Local School Board.
“Gusto niya ihatag ang full amount. Niana siya nga teachers are overworked but underpaid,” saysay niya.
Ang COA niisyu og notice of disallowance sa City Government aron kuhaan ug bawion ang cost of living allowance (COLA) sa mga mangtutudlo. Sa kinatibuk-an, nakadawat sila og P18,000.
Ang kaltas nagsugod niadtong 2017 diin ang Commission of Audit mokaltas og P5,000 sa cash assistance nga madawat sa matag magtutudlo tungod kay di awtorisado ang paghatag niini niadtong 2015.
Ang yearly allowance nagkantidad og P10,000 matag magtutudlo apan, P5,000 nalang ang madawat tungod sa kaltas.
Pasabot ni Diola nga ila na kining gitrabaho ug ila usab gisuta ang legal nga aksyon alang niini.
Iyang giklaro nga gusto ang mayor nga tibuok ang madawat sa mga magtutudlo karong tuiga. (JCT)