SUPERBALITA CEBU

Pangkidnap di tinuod

DI TINUOD nga dunay mga bata nga gidagit dinhi sa Sugbo ug sa ubang mga dapit sa Kabisay-an.

Gihulagway ni Police Major Anthony Autencio, deputy chief sa Philippine National Police (PNP) Anti-Kidnapping Group Visayas Field Unit, ang mga social media post nga “fake news.”

Matod ni Autencio sa interbyu sa Superbalita Cebu nga “way factual basis, unvalidated, fake news” ang nanggawas nga mga taho sa Facebook nga naghisgot nga dunay mga bata nga gidagit sa mga tawo nga nagsakay og van.

Siya niingon nga ang ilang gipangsusi ang mga taho ug natino nga di tinuod.

Gipahimangnoan ni Autencio ang publiko sa pag-share sa Facebook og fake news kay kini makamugna og “panic, maka-trauma” sa kabataan.

Matod niya nga kon dunay kahibudngang mga tawo, itaho gilayon sa labing duol nga police station aron masusi gilayon kon tinuod ba o di ang pagduda, inay nga modiretso og post sa social media bisan wa pa matino ang katinuoran.

Post di tinuod

Ang pamahayag sa kapulisan giluwatan human sa mga social media post nga nag-ingon nga dunay gidagit nga mga bata nga gisakay og van.

Nag-viral sa social media ang post sa usa ka netizen nga taga siyudad sa Danao nga nag-asoy nga dunay puti nga van nga nag parking sa Barangay Poblacion nga adunay sakay nga wala niya mailhi.

Kadudahan ang lihok sa mga sakay sa dihang gi agni siya nga mopalit og pahumot.

Nangutana pa kaniya ang babaye nga sakay sa puti nga van kon asa ang Masbate, Danao apan tungod kay wa ang maong lugar sa Danao, iya kining gitubag nga wala ug Barangay Masaba ra ang naa sa ilang siyudad.

Milabay ang lima ka minutos, usa na usab ka lalake ang mikanaog ug gihaylo siyag pahumot ug gipugos siya sa pagpasimhot niini.

Tungod kay nagduda siya nga lain ang tuyo sa maong tawo, iya kining gibalibaran.

Human sa duha ka oras, nagbaktas siya paingon sa ilang balay ug iyang nasugatan ang van ug iyang nadunggan ang singgit sa bata nga nangayog tabang nga naghilak sa sulod.

Dugang pa sa iyang post sa Facebook nga sa pag abot niya sa dalan Juan Luna gitawag siya sa driver sa puti nga van ug giagni nga mangaon sa usa ka fastfood chain.

“Giingnan ko niya nga mangaon lagi ta, kami bahala nimo” ug tungod sa kahadlok iyang gitukmod ang lalake nga nagkupot ug dayong dagan.

Apan si Police Lieutenant Colonel Maribel Getigan, hepe sa Danao City Police station, nihulagway sa post nga fake news.

Niadtong Lunes, Disyembre 2, ilang gipatawag ang nag post sa Facebook ug nikompirmar kini nga di tinuod.

“Actually nabasa na namo then we get that specific person kon kinsa tong nag post. Then actually, wala man gyud so far. It’s really a fake news. So, ang advise nato though it’s a fake news, but let’s all be alert at all times kay we really do not know,” matod ni Getigan.

Di lang mokompyansa

Si Police Brigadier General Ildebrande Usana, deputy regional Director for administration sa Police Regional Office 7 nagkanayon nga dili tinuod ang mga nanggawas sa social media labot sa puti nga van nga managit og bata. Apan bisan pa niini, giawhag gihapon niya ang publiko nga magbantay lang sa kanunay aron di mabiktima sa mga kriminal.

Ang Camp Crame mipahibawo na usab nga way kamatuoran ang mikatap sa social media labot sa giingong mga kidnapper sa kaulohan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph