TINUN-AN nga nag-post sa iyang Facebook account nga gisuwayan siyag dagit sa mga lalake nga luwan sa usa ka puti nga van sa Siyudad sa Danao niadtong Lunes, Disyembre 2, 2019, pasakaan og kaso sa Danao City Police Station bisan nangayo na og pasaylo tungod sa dili tinuod niyang estorya.
Nangayo nag pasaylo sa kapulisan lakip na sa mga opisyal sa Kagamhanan sa Dakbayan sa Danao si Brigs Granada Alvaro, 21, tinun-an sa kolehiyo, tungod sa iyang pagpatuo nga hapit siya dagita sa mga lalake nga nagsakay og puti nga van.
Matod ni Police Lieutenant Colonel Maribel Getigan, hepe sa Danao City Police Station, nga ilang gipatawag si Alvaro sa ilang buhatan aron imbestigahon.
Dinhi nasuta nga di tinuod ang pangangkon ug iya lang kining hinimo-himo.
Bisan pa sa gihimo ni Alvaro, ila gihapon nga pasakaan og kasong alarm and scandal ug kalapasan sa Anti-Cyber Crime Law ang 21 anyos tungod sa kahasol nga iyang nahimo sa publiko sa dihang nangahadlok na ang katawhan sa nabasahan sa iyang post sa social media.
Daghan ang mi share nga mga netizen sa post.
“Amo nang gi coordinate sa RACU 7 (Regional Anti Crime Unit). Actually regular filing lang siya but then we have to endorse the supporting document as evidence para sila na mismo ang mo-file,” matod ni Getigan.
Kon mamatud-ang sad-an sa alarm and scandal, ang batan-on bilangguon og usa ka adlaw ngadto sa 30 ka adlaw.
Tinuon pa sa kapulisan kon unsa nga probisyon sa anti cyber law ang gamiton sa pagpasaka og kaso.
Sakpan sa CCTV
Giangkon ni Getigan nga human mag-viral ang post sa tinun-an, nihimo dayon silag imbestigasyon. Ilang gipangsubay ang mga lugar nga ginganlan niini sa Facebook aron masusi ang mga close circuit television (CCTV) camera.
Apan nasuta nga way puti nga van nga niagi sa maong lugar sa oras nga gibutyag ni Alvaro sa iyang account sa Facebook.
“Kay ang Danao City has its CCTV naman gud sa halos tanan nga areas. So. ang specific na yan naa may CCTV. So immediately, ang LGU ug ang PNP gitan-aw nato kon naa ba. So, ang iyang gi-describe nga van wala may van didto ana nga time. So, siya na mismo giamin niya,” dugang ni Getigan.
Dugang ni Getigan nga gipaubos nila sa psychological intervention ang tinun-an.
Ang nag himo niini mao ang city social welfare sa Danao aron matino kon wa ba siyay problema nga gihambin.
Giingong niangkon siya nga nisakay lang siya sa panahon sa dihang nag viral usab ang post sa social media nga adunay mga kidnapper sa kaulohan nga manguhag mga bata aron kuhaan og internal organs.
Wa sa Cebu City
Samtang hugot usab nga gihimakak sa deputy city director for operations sa Cebu City Police Office, Police Lieutenant Colonel Randy Korret, labot sa post usab sa Facebook nga adunay bata nga suway nga dagiton sa mga tawo nga sakay sa usa ka itom nga van.
Way nag pa blotter sa police station sa Dakbayan sa Sugbo nga adunay insidente sa suway nga pagpanagit.
Apan bisan pa niini gipahingusgan karon sa kapulisan ang ilang checkpoint sa dakbayan.
Susihon kadtong mga van nga di makita ang sulod tungod sa ka itom sa tint.
Awhag usab niya sa publiko nga di maayo nga i-post sa Facebook ang pag mugna-mugna og estorya nga makapahadlok sa publiko.
Giklaro usab ni Mayor Edgardo Labella nga way nahitabo nga pagpanguha og bata sa 80 ka mga barangay sa dakbayan sa Sugbo.
Ang pamahayag giluwatan sa mayor human adunay daghang mikatap sa social media ug mga mensahe nga gipasa-pasa nga adunay mga kidnapping nga nahitabo labi na sa Barangay Punta Princesa ug ubang dapit sa siyudad.
“There was zero kidnapping since we assumed office. Hopefully this will continue. I checked all of these. Don’t you know that I am calling the the chief of police everyday? Mura lang kog wala apan, nagsige intawon kog monitor,” padayag sa mayor.
“And crimes ra gyud ang kanang crimes against person that refers to murder, homicide and most if not all related to drugs, most if not all the personalities involved are related to drugs, “dugang ni labella.
Gi-warningan sa mayor ang mga tawo kinsa nagpakatap og sayop nga balita hilabi na kon sila nagtuo nga wala silay tulobagon sanglit adunay balaod nga nagdili niini.
“Those who are making a fake news, remember there is a Presidential Decree no. 90, making rumor mongering as punishable by law. I’m warning them, stop spreading that fake news,”pahimangno sa mayor.