WAY nakitang foul play ang kapulisan sa Siyudad sa Sugbo sa kamatayon sa 18 anyos nga tinun-an sa Ramon Duterte Memorial High School sa sapa sa Barangay Kalunasan, Siyudad sa Sugbo, Martes sa hapon, Disyembre 3, 2019.
Ang biktima nga si Christian Redoble napalgan nga patay nga gibutyag sa mga kauban nga naligo ug nalumos sa sapa.
Giingong naligas ang tiil ni Redoble sa gipatungan niining bato ug natagak sa sapa.
Gituohan nga napantok ang ulo niini sa bato una pa natagak sa tubig ug gianod sa lawom nga bahin hinungdan sa pagkalumos.
Human sa insidente, gipaubos dayon sa imbestigasyon ang tulo ka mga kauban niini apan nag tugma ang ilang mga pamahayag nga disgrasya ang nahitabo.
Matod ni Police Lieutenant Colonel Clark Arriola, information officer sa CCPO, nga bisan sa pamahayag sa tulo, ipaubos gihapon nila sa autopsy ang lawas ni Redoble.
“Walay foul play. And kadtong tulo ka kuyog niya during that incident is gi-question sad to sa atung imbestigador sa Station 9 and initially nga it was found out nga walay foul play,” matod ni Arriola.
Sa nakuha nga impormasyon sa kapulisan nga niadto sila sa sapa sa Kalunasan aron mangaligo apan samtang nangaligo nag inom usab ang mga managhigala.
Matod ni Arriola nga ang hitabo way kalabutan sa bagyong Tisoy.
Nananghid
“Kon naminaw pa lang ka sa amo, Nak, dili unta ka maing ani,” sulti ni Jocelyn Redoble, inahan, samtang naggakos sa lawas sa iyang anak nga nakaplagang patay sa sapa sa Sityo Balisong, Barangay Kalunasan, Martes pasado alas singko sa hapon.
Gikan sa pagkahaw-as sa lawas ni Christian, gidala kini sa Sityo Bolisao sa Barangay Sapangdaku, apan sa pagsuta sa medical team, wa nay pulso ang biktima.
Sila si Jocelyn ug Alexander Paul Benlota nakugang human masayod sa nahitabo sa ilang anak.
Matod pa ni Jocelyn nga pananghid ni Christian kaniya nga igo lang magduwa og basketball uban ang mga barkada.
“Niingon pa gyud nang iyang ig-agaw nga ayaw lang saba sa imong mama asa ta padulong..Kadungog ko ato pero wala lang to sa ako nga diri diay sila paingon,”sulti ni Jocelyn sa Superbalita Cebu.
Nagplano pa sila nga ipailis na sa apelyidong Benlota ang apelyido ni Christian sunod tuig tungod kay ang apelyido pa man sa inahan ang gidala.
Si Christian kamagulangang anak nila ni Jocelyn ug Alexander Paul sa lima ka mga magsuon.
Sa wa pa ang hitabo, si Christian uban sa iyang ig-agaw nga si Hezekiah Asher Celestial, 16,ug duha ka mga silingan nga sila si Dennis Dichoso, 20; ug Robert Mahilum, 18, nagkasabot nga mangaligo sa sapa.
Nigikan sila alas 2 Martes sa hapon bitbit ang usa ka botelyang ilimnong makahubog, walo ka putos nga tag pisohon nga fish cracker ug usa ka litro nga botelyang tubig.
Alas 5 pasado dihang pauli na unta ang upat, giingong nadakin-as si Christian sa busay padulhog sa sapa nga dunay kabatoan.