TALIWALA sa maayong dagan na sa panahon human nga anam nang migawas si Bagyong Tisoy sa Philippine Area of Responsibility (PAR), pipila ka mga flight sa gikan sa Mactan-Cebu paingon sa Legazpi City, Albay padayong kanselado.
Base sa gipahibawo ni Avigael Ratcliffe, Corporate Communications Jr. Manager sa GMR MEGAWIDE Cebu Airport Corporation (GMCAC) gumikan sa pagkaguba sa pipila ka bahin sa domestic airport sa maong lalawigan, resulta sa maong bagyo.
“Until karon guba ang ilang (Legazpi) airport. Adunay glass panel (sa maong airport) ang nangabuak,” butyag ni Ratcliffe sa dihang nahinabi sa Superbalita Cebu.
Atol niining pagsuwat ang biyahe sa Cebu Pacific nga DG 6205 ug DG 6204 ang konpirmadong gikanselar kagahapon, Disyembre 4.
Samtang gipaabot pa ang konpirmasyon sa Philippine Airlines nga adunay susamang destinasyon kon mikanselar ba sab sa ilang flights.
Misaad ang GMCAC nga sa higayon nga mabalik sa normal nga operasyon ang Legazpi airport moluwat gilayon sila og abiso sa publiko.
Sa laing bahin, moabot ngadto sa 41 ka flights sa Mactan Cebu International Airport (MCIA) ang wa makabiyahe niadtong Lunes, Disyembre 2 ug Martes, Disyembre 3 gumikan sa dautan nga panahon resulta sa maong bagyo.
Ang mga apektado nga biyahe sa mao kadtong mopaingon sa El Nido, Palawan; Legazpi, Albay; Manila ug Caticlan, Aklan.
Nakatabang sab ang sayo nga public advisory nga giluwatan sa airlines nga nagpahibawo sa ilang cancelled flights. (FVQ)