DUL-AN sa usa ka buwan gikan sa iyang kalit nga pagbiya sa Cebu-Casino Ethyl Alcohol, ang beteranong shooter nga si Patrick Jan Cabahug mahibalik na sa iyang naandan nga tour of duty - ang pagduwa gawas sa nasod.
Kini human nga ang lumad nga taga lungsod sa Minglanilla gikuha sa Thailand alang sa 2019 Anning Bloomage B-One League basketball invitational tournament nga ipahigayon sa China.
Dili bag-o alang ni Cabahug ang pagduwa sa abroad sanglit nakaduwa na usab ni siya sa Westport Malaysian Dragons ug sa Kuala Lumpur sa Asian Basketball League.
Niadtong 2014 gikuha usab kini siya sa Thailand alang sa ABL diin iyang gikauban ang laing Sugboanon ug katagi lungsod nga si Jeric Canada.
Niadtong higayona sila maoy nakampiyon. Apan ning higayona, gitug-an ni Cabahug nga siya lang ang bugtong Pinoy sa ilang lineup. “Molarga ko sa December 6. Ako ra may Pinoy sa among lineup,” matod ni Cabahug.
Ang torneyo salmotan sa unom ka mga teams gikan sa nagkalainlaing nasod. Kini ao ang Anning Zhonginleshi ug Bloomage International nga pulos gikan sa China, Tokyo Japan, Manila-Philippines, Bangkok-Thailand ug New Delhi.
Kon kahinumdoman, niadtong Nobiyembre 18, si Cabahug nakahukom nga mobiya sa Cebu-Casino Ethyl Alcohol tungod, kay matod pa niya, nga dili sila magkasinabot sa bag-ong coach nga si Noynoy Falcasantos kinsa maoy mipuli ni coach Norberto “Titing” Manalili.
Iyang gitug-an nga dili siya haom sa sistema ni Falcasantos ug wala na usab siya hatagi og playing time. Tungod niini, boluntaryo na lang siyang mipahawa sa team. (JBM)