SAKTONG dominasyon maoy gipakita sa Tubu Masters Construction and Services human nila gilubong ang Mohonde, 109-71, sa championship game niatong Lunes, Disyembre 2 sa Tomonoy Fiesta League sa lungsod sa Moalboal.
Ang presensiya sa kanhi sakop sa Cebu Sharks-Casino Ethyl Alcohol nga si Jayford Rodriguez nga giabagan usab nila ni Gab Cometa sa UV Lancers ug kanhi import sa USPF Panthers nga si Richie Managor maoy naggiya sa Tubu Masters aron yanong langkaton ang kampiyonato sa matag tuig nga torneyo.
Mikabat ngadto sa 28 ka mga teams ang misalmot sa liga nga gibahin ngadto sa upat ka mga brackets.
Ang no. 1 team sa matag bracket maoy miabanti sa semis.
Ubos sa pagdumala ni coach Renato Alforque, ang Tubu Masters ni team-owner Rodolfo Borja milangkat sa kampiyonato nga wala makatilaw og pildi.
Sa pagsugod sa sayong bahin sa first quarter, ang Tubu Masters sayo dayong kaayong mihunat sa ilang agresibong depensa ug miposte og 56-32 nga labaw pagsira sa first half.
Gikan niadto wala na gyud kini molingi pa hangtod sa katapusang gutlo sa duwa.
“Ang atong pag-apil sa lega, nagpakita nga misuporta ta sa sports development not only sa barangay, kon dili sa lungsod, in general. Mao man say hilig nato ning sports,” matod ni Borja kinsa di pa lang dugay nakadawat na usab og laing invitation. (JBM)