Rockets gipatugpa sa Spurs sa 2 ka OT

DAW lungag sa dagom ang gilutsan sa hosts San Antonio Spurs una nila nasugakod ang kabangis ni James Harden sa ilang double overtime nga kadaugan batok sa Houston Rockets, 135-133, kagahapon sa National Basketball Association (NBA).

Ang duwa nabulingan og kontrobersya dihang wala gi-counted sa mga referee ang hansak ni Harden bisan tataw nga nasulod ang bola sa nahabiling 7:53 minutos diin niadtong higayuna naglabaw ang Rockets, 102-89.

Sa paghansak ni Harden, makita nga nilusot na ang bola sa ring apan sa wala damha misaka kini og balik human nasangit sa net sa dayong paggawas niini hinungdan nga sa tan-aw sa referee wa kini nasulod ang bola.

Apan matod ni crew head James Capers nga ma-counted unta kini kon nihangyo pa ang Rockets nga i-review sa video ang maong hansak ni Harden sulod sa 30 ka mga segundos sa pagkahitabo niini.

Ang maong hitabo nakapausab sa momentum ug mitapon na kini sa Spurs ug gipaneguro ni Lonnie Walker nga dili na kini mahibalik pa sa Spurs.

Gipangulohan ni Walker ang kadaugan pinaagi sa iyang career-high nga 28 puntos, nidugang og 25 puntos si Bryn Fornes samtang niamot og 23 puntos si DeMar DeRozan.

“We just stopped playing and they gained confidence,” matod ni Harden, kinsa maoy nangulo sa Rockets pinaagi sa iyang 50 puntos.

Ang Spurs mingsaka sa 8-14 nga rekord samtang ang Rockets mingkanaog sa 13-7 nga baraha.

Ang Rockets nakaposte unta og 22 puntos nga labaw apan hinayhinay kining gipangkitkit sa Spurs hangtod nga nakapugos sila og overtime.

Human niini, nagpahugtanay og bakus ang duha ka mga kampo hangtod na sa pagtiklop sa kombati.

“It was confidence,” matod ni Walker. “My teammates kept me going, and once I started feeling it, I’m just going to let it go and play my game. I know what I can and cannot do. I’m just happy that we played team ball and we got this win.”

Sa laing gikaintapang kombati, ningbangon dayon gikan sa pagkapandol ang Los Angeles Lakers ug ilang gipahimungtan ang hosts Denver Nuggets, 105-96.

Gipangulohan na sab sa duha ka All-Stars nga sila si LeBron James ug Anthony Davis ang Lakers pinaagi sa ilang 25 puntos matag usa.

Sa uban pang mga sangka, ningdaog ang Miami Heat batok sa Toronto Raptors, 121-110 (OT), Los Angeles Clippers batok Portland TraiBlazers, 117-97, Dallas Mavericks batok New Orleans Pelicans, 118-97, Orlando Magic batok Washington Wizards, 127-120, ug Detriot Pistons batok Cleveland Cavaliers, 127-94. (AP, ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph