DEAR Noy Kulas,
Kining akong suliran kabahin ni sa akong bana nga grabe ka yawyawan. Sa wa pa mi maminyo, naa mi mga live-in. Naa koy anak while sila wa makaanak. Wa ko magtuo nga naa pay makigminyo o mo-serious nako nga lalake pero niabot siya sa akong kinabuhi.
Naa mi trabaho pero mas dako ko og kita niya kay naa koy sideline nga buy and sell. Siya kay trabaho ra ang gisaligan nga income unya maguwang ra og gamay sa basic nga salary. Karon nag-eskwela na ang akong anak sa private school, need nako nga gastuhan nga di ko mangayo niya kay wa siyay labot sa bata. Usahay makapangutang ko kay aron apason ang among mga gastuhan sa balay ug akong anak. Mao na ang among awayan kay kuno palautang ko.
Usahay modako og maayo ang among away, gikan sa utang ngadto na sa akong past. Sakit kaayo paminawon ang iyang mga sulti nga maora na ko og burikat nga unta iya na man kong gidawat nga duna koy anak ug gipakaslan pa niya. Kadaghan na nahitabo. Unta di siya angay nga masuko kon mangutang ko kay wa ko mangayo niya og bisan peso kay kaya nako ang pagbayad. Ako ra siyang gi-inform kay bana gud nako siya. Wa ko mangayo sa iyang sweldo nga iyaha rang solo.
Noy, unsa kahay akong buhaton aron maundang na siya sa iyang pagpasakit og sulti nako? Nasakitan na kaayo ko sa iyang mga insulto nako.
Kath
Kath,
Wa man kaha ka magpangayo niya, ayaw na lang siya sultihi o pahibaw-a kon mangutang ka. Kay di bitaw siya ang mobayad, ikaw ra man. Useless ang pagpahibawo niya kay di man siya tighatagan nimo og kwarta unya mosangko pa sa inyong away. Maayo man unta tog tingbayad, siya ang mobayad o mohatag siya og kwarta para inyong budget.
Naay mga lalake nga grabe og baba kon masuko, magpataka na lang og estorya, sakit kaayo. Deep inside him naa diay siyay butang nga wa mauyoni sa imong past or wa niya fully nga madawat nga duna kay anak sa laing lalake. Mogawas ni panahon nga naa siya sa kasuko. Sakit bitaw na paminawon ug huna-hunaon kay gikan na sa tawo nga imong gimahal ug gituohan nimong nagmahal nimo. Gimahal ka niya mao nga gipakaslan ka but, naa lay panahon nga maratsada kon masuko siya.
So, ang simple nga solution niana mao ang pagsekreto na sa imong pagpangutang aron wa nay awayan.
Noy Kulas
(e-mail: kulassuper@sunstar.com.ph)