HUMAN sa kusganon ug malampuson nga kampaniya sa paghawan sa atong mga sidewalk batok sa mga sidewalk vendors, morag miaksiyon man og bahar ang baruganan ni Mayor Edgardo Labella.
Iya naman nga tugutan ang vendors nga makabalik sa ilang naandang puwesto matag Sabado ug Dominggo ug pasalmuton sa night market sugod niadtong Disyembre 1 hangtud sa Enero 30.
Mipatigbabaw ba ang pulitikanhon nga interes ni Labella o bunga ba kini sa iyang pagkamaayong tawo nga adunay malumo nga kasingkasing nga makamaong maluoy sa mga tawong kabus ug timawa?
Matod pa sa beteranong radio broadcaster nga si Edgar Gutierrez, akong co-anchor sa Super Hirit program sa DYSS Super Radyo Cebu, nga sama sa kanta, ‘Torn between two lovers’, si Mayor Labella. Ingon og adunay duha ka gamhanang puwersa nga nagbira-bira sa mayor kabahin ning isyo sa sidewalk vendors.
Kining maong duha ka puwersa mao ang political will sa pagpatuman sa kamanduan sa nasudnong kagamhanan paghawan sa mga kalsada ug mga sidewalk sa tanang nakababag niini labi pa gyud ang mga sidewalk vendor nga nakahatag og purwesyo sa mga gustong mogamit niini.
Ag ikaduhang puwersa mao ang pagbati sa mayor ngadto sa mga kabus ug timawa nga nanginabuhi lang usab diha sa daplin sa kadalanan.
Usa ka kamanduan ni Presidente Rodrigo Duterte ngadto sa tanang mga local chief executives nga hawanan ang mga dalan gikan sa mga obstruction.
Ug halapad kining maong kamanduan gumikan kay tibuok nasud man kini. Ug pursigido nga mosunod gyud ang tanang hingtungdan nga mga lokal nga opisyal kay dilikado nga masuspenso.
Mao nga mabasa nato sa baruganan sa mayor nga nagkinahanglan siya og lig-on nga baruganan alang sa kaayuhan sa tanan.
Unsaon man niya sa pagpabalanse tali sa mga tawo aron hayahay kaayo nga mogamit sa mga kalsada og mga sidewalk ug sa mga maapektuhan nga sektor nga nanginabuhi lang usab apan anaa sa di insaktong lugar? (bobbygnalzaro@gmail.com)