KINSAY dili mabalaka nga ginikanan sa gipakatap sa social media bahin sa bata nga gikidnap sa Sugbo? Mao kini hinungdan nga ang maong post nag-trending ning ulahi. Grabe ang reaksiyon sa netizens ug panawagan sa awtoridad sa pagsusi sa naasoy nga kaso.
Apan nasuta nga di tinuod nga dunay mga bata nga gidagit dinhi sa Sugbo ug sa ubang mga dapit sa Kabisay-an. Gikataho nga nasubay usab sa cyber experts sa Phlippine National Police (PNP) ug napamatud-an nga fake news kini o ginamagama lang sa hunahuna sa nag-post.
Mao kini ang paghulagway ni Police Major Anthony Autencio, deputy chief sa Philippine National Police (PNP) Anti-Kidnapping Group Visayas Field Unit.
Si Autencio nahinabi sa Superbalita Cebu nga ‘walay basihanan ang maong taho busa matawag kini og fake news’ ang gipakatap sa Facebook nga naghisgot nga dunay mga bata nga gidagit sa mga tawo nga nagsakay og van.
Gipahimangnoan ni Autencio ang publiko sa dili pag-share sa Facebook og fake news kay kini makamugna og panic ug trauma sa kabataan lakip sa mga ginikanan labi na nga makahadlok kaayo ang paghulagway sa giingong nahitabo nga pagpangkidnap.
Samtang, kon nasubay sa PNP ang tinubdan sa fake news, maayong ipublikar o i-post usab nila sa social media sa ilang aksiyon nga gibuhat. Dako ang gihimo niini kadaut sa pagbati sa publiko. Apan, sumala sa taho, igo lang pahimangnoan o gikasab-an sa awtoridad? Walay kasong gipasaka? Kon dunay bug-at nga aksiyon o silot, kini mohatag og mensahe sa ubang buot magduwaduwa sa social media. Labi na nga ma-access kini sa tanan, magpanagana o dili na mohimo sa susamang salaud.
Ang social media dako og matabang kanato ug moabli og opurtunidad kon gamiton sa saktong pamaagi, apan ingon kadako ang kadaut kon abusohan. Palihog tahora ang social media.