GIKATAKDANG palapdan sa Dakbayan sa Mandaue ang operasyon sa mobile app nga Guardian Emergency Response pinaagi sa mga barangay clusters sugod sa Subangdaku, dayon sa umaabot sa Banilad, Basak ug Cubacub.
Gitugon kini ni Mayor Jonas C. Cortes sa iyang mga sinaligan human sa panagtigom nila uban sa kadagkuan sa SugboTek, Inc. nga miugmad sa maong service-oriented software.
Uban ning kalambuan, gipadala sa dakbayan ang dugang nga mga kawani sa Guardian Center alang sa pag-bansay-bansay isip mga emergency call-taker ug dispatcher agi og pag-andam sa maong pagpalapad, mibutyag si SugboTek CEO Cloyd B. Dedicatoria.
Miuban nila ang mga kasamtangan ug bag-ong Guardian operators gikan sa mga pilot barangays sa dakbayan sa Sugbo – Apas, Santo Nino, Poblacion Pardo ug Tisa – alang usab sa ilang refresher, ug ingon man sa pagpangandam alang sa pag-roll-out na pod unya sa Guardian sa maong dakbayan.
Unang gipadagan ang Guardian sa upat ka mga pilot barangay pagka-Enero sa miaging tuig, samtang misunod ang Mandaue pagka-Disyembre sa samang tuig.
Dugang pa, gitiman-an ni Mayor Edgardo C. Labella alang sa Dakbayan sa Sugbo pagka-Okt. 30 ang kasabutan tali sa SubgoTek alang sa pagpakatap lukop lungsod sugod sa Command Control Center (C3) diha sa Mambaling.
Gikatakdang ma-online ang C3 ni’ng bulana human sa pagpanaud ug pag-bansay-bansay sa mga kawani, samtang malaumon ang SugboTek nga mosunod ang Dakbayan sa Talisay sa dili pa matapos ni’ng tuiga, ug mamugna ang usa ka “more coordinated mesh for emergency response in Metro Cebu.”
Katuyuan sa Guardian nga ma-devolve ang pagdawat sa mga panawagan alang sa mga kakulian sa barangay level kansang operators mas nakahibalo sa geographic details sa ilang dapit ug mas sayon ra ang pagduma sa responders, matod ni Dedicatoria.
Ma-download nga libre pinaagi sa internet, tugtan sa Guardian ang publiko nga mogamit sa ilang mobile phones kon magpakitabang atol sa emerhensiya o’ motaho og panghitabo “sa usa lang a pindot sa telepono,” siya miingon.
I-alerto sa maong app ang pinakaduol nga Guardian command center kansang operator manawag sa misangpit alang sa mga detalye. Gamit sa kaabag nga software, ipadala niini ang gikinahanglang kahimanan ug mga mo-responde, siya mipasabot.
Gawas sa mga kawani ug kahimanan sa LGU ug mga ahensiya sa kagamhanan, ma-alerto sab sa Guardian ang mga miparehistro nga mga volunteer responders, sama sa mga doktor, nars ug tanod, siya midugang.
Gidasig sa SugboTek ang mga namuyo ug tig-anhia-an sa Metro Cebu sa pag-download gikan sa Google Play ang app nga “Guardian Emergency Response” ug mo-sign up aron makapanangpit kung may kakulian pinaagi sa Wi-Fi o mobile data internet.
Mamahimo sa’ng makapanangpit gamit ang Pipol Konek, ang public Wi-Fi system nga napakatap na sa Department of Information and Communication Technology (DICT), bisan kung anaa pa lang karn sa mga publikong tulunghaan ug pipila ka mga parke sama sa Plaza Independencia.
May offline mode sab ang Guardian, nga mahibal-an ang nahimutangan sa nanawag ug ang kakuliang kinahanglang matagad ug malantaw ang kahimtang gamit ang kamera sa nanawagan, mibutyag si Dedicatoria. (PR)