USA ka 8-anyos nga batang lalake ang gitabangan sa Kagamhanan sa Dakbayan sa Talisay sa fund raising niini alang sa iyang pagpaubos og ka-tulo ka chemotherapy matag semana tungod sa gihambin niini nga sakit.
Si Resh Nathan Formentera, uban sa iyang mga ginikanan ang nituyo sa buhatan ni Talisay City Mayor Gerald Anthony Gullas, Martes sa hapon, Disyembre 3, aron magpatabang sa ilang ‘a cup of hope’ nga programa, diin ang pamilya ang namaligya og tasa nga mobalor og P300.
Gitug-an sa mayor nga niadtong Lunes, Disyembre 2, pa sugod nikontak kanila ang inahan ni Resh nga si Sheila Formentera sa katuyuan nga tabangan sa mayor pag-promote sa ‘A cup of hope’.
Sa gi-post sa mayor sa iyang social media page, gisaysay niini nga si Resh ang adunay acute lymphoblastic leukemia diin na-diagnosed kini niadtong tres anyos pa lang.
“Last Dec. 1, I celebrated my 35th birthday, I’m just glad that I could reach my current age as a happy and healthy person. But not all are given the opportunity that I currently have like eight-year-old Resh Nathan Formentera. While some kids his age are out studying and playing to their heart’s content, Resh is instead on his bed, sickly and pale,” saysay ni Gullas.
Nahuman na unta ang pagtambal niini ning Agusto lang. Apan giingong’ nibalik na usab ang sakit ug ning tungora ang central nervous system na ang giigo sa maong klase sa sakit.
Ug isip tubag, si Gullas ang nitugot nga mamahimong’ mabaligya diha sa iyang buhatan ang maong mga baso ug andam usab nga modawat og hinabang ilabi na pinansyal nga ihatag ra usab ngadto sa pamilya ni Resh.
Nihatag usab og pinansyal nga hinabang ang mayor, gawas nga nipalit usab kini og baso uban na ang ubang kawani sa City hall.
Gipatabangan usab sa City Social Welfare Services. Wala na hinuon pa gitug-an sa kagamhanan kon pila ang hinabang.
“Aside from the chemotherapy sessions, Resh had to undergo intratical aspiration for his spine. When I first saw him, it truly broke my heart that Resh had to undergo all of this at a very young age," matod ni Gullas.
Sa mga buot motabang sa ginagmay nga paagi, ang ‘cup of hope’ mapalit diha sa talisay City Hall. (FMD)